Sunday, April 26, 2009

تـــــاج وزاره التربيه والتعليم



احنا انكتب علينا نجاوب تاجات كتيره
والتاج النهارده جانى من مين
من الاميره احساس طفله محبه للرومانسيه
و اميره الرومانسيه يــويــو
والاميره الفراشه الصغيره
نبتدى منين الحكايه
كان يا ماكان كان فيه امير قاعد فى حاله
فى الديسك الاخير
معرفش ايه بقى جراله
لما لقى الميس بتسال
ميس احساس
ميس يويو
ميس فراشه
وانا عليه انى اجاوب
خلاص هجاوب يا ميس
وامرى لله
بس على فكره ممنوع الضرب
والا هبلغ الوزاره تاخد حقى
انا قولت اهو
نبتدى بقى
ايه اول سؤال يا ميس

إسمك ؟
يانهار ابيض يا ميس انا بقالى سنتين فى المدرسه
ومش عارفه اسمى اللى واخد عقلك يا ميس هتفتكرى ايه ولا ايه
اسمى احمد يا ميس
رقم 20 فى الكشف
سنك ؟
انتى فقدتى الذاكره يا ميس ولا ايه
لا حول ولا قوه الا بالله
حاضر هجاوب من غير زعيق
سبعه وعشرين سنه وخمس شهور

بالضبط

مجال دراستك ؟
انتى يا ميس مش عارفه كمان انتى بتدرسى ايه
دا الموضوع كبر قوى
انا مجال دراستى تكنولوجيا انتاج
بشتغل فى مجال الجوده وشكلى كده
مش هاحضر تانى فى المدرسه دى هحول منها

إسم مدونتك ؟
من ساعه ما دخلت المدرسه يا ميس وانا مدونتى
اسمها رومنسى بس حاولت اغيرها بس قولت لا
خليها كده جايز اعجب
ههههههههههههههههههه
صورتك الرمزية فى المدونة بتعبر عن إيه؟
هو انتى يا ميس بتدى حصص رسم كمان
طيب صورتى بتدل على اتنين مصدقوا يلقوا
بعض ورايحين البحر يغرقوا همومهم
بعد ماقالوا اللى جواهم

هل فكرت فى إغلاق مدونتك؟ و السبب؟
انا يا ميس من غير كدب فكرت للحظات
بس قولت لا ممكن مكتبش الواجب
بس مهربش من المدرسه دى فيها اخواتى
اللى هما عشره عمر
اوليمبك
إيه رد فعلك لو حد قل أدبه عليك فى المدونة ؟
الصراحه يا ميس بتعامل بهدوء جدا
بس لو الموضوع كبر بروح للمديره بقى
تجيبلى حقى
أسوأ مدونة دخلتها ؟
هو طبعا كل شئ فى الدنيا فيه الحلو وفيه الوحش
بس دا علشان الحلو يبان ويكون دايما هو اللى عالى
بس طبعا فيه مدارس بتهين البشر والاسلام
ودى اسوأ مدونات
هيحصل أيه للإيميل بعد ما تموت؟
علمتينى يا ميس ان لكل شئ فى الدنيا عمر
يبقى اكيد الميل برضه هيبقى عمره انتهى لغايه كده
عطيت الباسوورد لحد قبل كده؟
هى اسمها عطيت ولا اعطيت يا ميس
احنا بنقول اديت يا ميس بس مش مشكله
المعنى مفتكرش يا ميس انى اديته لحد خالص

السفر بالنسبة لك؟
الصراحه يا ميس تفرق السفر مع مين وايه الغرض منه
يعنى لو كان غرض شغل بيبقى مرهق جدا
اما بقى لو غرض فسحه مع اللى بنحبه ان شاء الله اروح معاه المريخ
هيبقى سفر ممتع قوى

المود بتاعك ايه؟
انتى يا ميس بتسالينى اسئله زى ما تكونى مش معانا فى الفصل اصلا
بس اقولك انا متقلب المزاج لما بكون سعيد بحس انى عندى طاقه تكفى الدنيا بحالها
اما بقى وانا زعلان مش بعرف افكر لانى القلق بيكون زى الشوكه اللى مش بتخلى الانسان يفكر فى حاجه خالص

بتعمل أيه في وقت فراغك؟
مش هكدب عليكى يا ميس لاما بكتب الواجب اللى عليه يا اما على الكمبيوتر
والنت بجيب دروسى من عليه شوفتى بقى انا شاطر ازاى

الأكلة المفضلة؟
انا بحب اى حاجه والدتى بتعملها من ايديها
بس بحب قوى الفراخ
والسمك المشوى
الصفات التي أخذتها عن والدك؟
والدى الله يرحمه انا ورثت منه الطيبه والقلب الكبير يا ميس
اظن دلوقتى بعانى منهم قوى بحس انى فى عالم تانى
بس يا ميس انا مش هتغيير انا زى ما انا
الصفات التي أخذتها من والدتك؟
اخدت منها حاجات كتير بس اهمها انى اكون انسان رحيم بالناس
اقدر ظروفهم واقف جنبهم واساعدهم على قد ما اقدر
اكثر ست حاجات بتحبهم؟
والدى الله يرحمه ووالدتى واخواتى
الشغل والحبيبه اللى منتظرها
وكوبايه شاى تقيله ساعه العصريه
اكتر ست حاجات بتكرههم؟؟
مش بحب القلق بالرغم انه شئ اساسى
النفاق اللى كتر فى الفصل والمدرسه كلها
انى اشوف حد محتاجنى وانا مش قادر اساعده
وبكره الحصه اللى مستفدتش منها خالص
شخصيتك نوعها أيه؟
يعنى ايه يا ميس فهمينى بالراحه
اللى اعرفه انى شخصيه بيقولوا عليه انى طيب متقلب المزاج احيانا
اجتماعى بحب الناس
ملتزم بعمل الواجب ممكن غلط بس بعمله

لماذا دخلت عالم التدوين من الأساس؟
اللى يعيش يا ميس هيشوف انا دخلت عالم التدوين علشان اتعلم
اعرف افكار جديده احس ان ليه اخوات واصدقاء غير الكدابين اللى فى المدرسه
دول
أحلى جملة قيلت في وصف مدونتك؟
الصراحه الكلام اتقال كتير انها جميله وعالم تانى بعيد عن الارض
أهمية التعليقات بالنسبة لك؟
اه يا ميس اهميتها
دى بقى زى بقى كراسه التحضير بالنسبه للمدرس
ميقدرش يستغنى عنها ابدا
احلى بوست كتبته؟ وضع اللينك ثم أذكر السبب؟
دى مقدرش احدها لانى بحس بكل كلمه حاسس انهم كلهم حلوين
وبعدين يا ميس انتى شوفى بنفسك واللى يعجبك ادينى عليه درجه

افضل مدونة قرأتها؟
انا قريت مدونات كتير بس افضلهم دى صعب لان كل انسان شاطر فى مجاله قوى
الشغل بالنسبة لك؟
حياتى
الأنترنت بالنسبة لك؟
وسيله جميله لربط الافكار والحصول على المعلومات والحاجات اللى عمرى ما عرفتها
تمرر التاج ده لمين؟
ليه بس كده يا ميس
اكيد لزمايلى فى الفصل اللى بيبصولى دول
اسئليهم يا ميس براحتك بقى ماعدا زميلى اللى نايم جنبى دا
ومش عاوز ياخد التاج ولا اصلا يحله
ايوه يا ميس دا زميلى وصديقى

تامر الحسينى
سبيه نايم يا ميس
وبعدين لو عاوز يجاوبه بقى يجاوبه

بس انا هديه لميس


والدكتوره


والدكتوره



واللى مجاوبش على التاج يتفضل


**********************
الحمد لله يا ميس انا خلصت الواجب
عاوز النتيجه بقى بسرعه ومش تستقصدينى تانى يا ميس

106 comments:

ShiMOo said...

لولولولولولولولولوي


اووووووووووول كومنت
تاااااااااااااني بوست على التوازي :D
هرورح اقرا واجي على طووووووول

ShiMOo said...

96%

يالا بسرعه روح ادخل بيهم صيدلة :D

بس جميل البوست وردودك كمان
واسلوبك بقى احلى واحلى
وانا بقراه حسيت بجو حلو كده
خرجني من المود الزفت اللي كنت فيه
عندي امتحان بكره يا نااااااااااااس
:(( :(( :((

صوت من مصر said...

اه يبتاع الفراخ والسمك وانا من عشاق المش فعلا الرومنسيه لا تختلط بالنضال صح ولا ايه احسن تبقى عك

نهر الحب said...

ازيك يا رومانسى
اية اخبارك والله وحشتنى مودتنك جدا اسفة على تقصيرى معك
حلوة اوى اجاباتك النموذجية دى
بالتوفيق يا رومنسى
اديك
99%
حلو كدة:)

marmar said...

بالرغم اني اهديتك التاج ده قبل كده الا انك مجاوبتش عليه في وقته فعقابا ليك درجتك هتكون سالب مليون
ولو عملت ايه حتى
مش هتبقى غير سالب مليون
بعدين فراخ مين وسمك مشوي
انا بدخل عل مفيد
حمااااااااااااااااااااااااااااام
ما تجبلوي حمام بقققققققققققققققققى

اجمل كلمه اتقالت في مدونتك
كلمتي
"رومانسيات رومانسي الشقيه"
تحياتي يا كبيييييييييييييييييير

marmar said...

معلش البوست اللي فات راح مني
اصلي كنت في عالم تاني بعيد عن الارض
زي وصف مدونتك
كنت بذااااااااااااكر وطالع عيني
الحمدلله انك مريت على خير من التوهان
وكل شم نسيم وتحرير سينا وانت بألف خير بعيد عن التوهان والقلق
روح البحر
وارميله كل همومك
هو وحده هيقدر يسمعك كويس اوي ويريحك

”*°•.˜”*°•..سونه..•°*”˜.•°*”˜ said...

السلام عليكم .
اكيد الكل محتاج للتاج ده عشان يعرف ارمنسى بيفكر ازاى
بس انا لسه هكمل الاجابات وارجه
اكيد ناجح ان شاء الله
هروح اقرء الباقى بقى
انا قلت اجى قبل الزحمه دانا على ما دخلة كان زاد 2
تحياتى سونه.

dramaqueen said...

برافوووووووووووووووو عليك
10\10

عاشقة الأحزان said...

السلام عليكم
جامد قوووى
أنا برده جانى تاج وجاوبت عليه حالا
بس صعب قووى
ربنا يستر
تحياتى

My Hope$ said...

ههههههههههههه هما اللي بعتنلك التاج مدرسين

ياميس ياميس شكلك كنت طالب مثالي

فعلا كل اللي كتبة كان حلو

واجاباتك بردة في التاج دة حلوة


اكيد نجحت

Nasimlibya said...

لااااااااااااا ترتيب رقم حداشر الحمد لله



ايييييييييه لسه ف تاجات وامتحانات مش يا احمد حتي اني عندي تاج وماجلته شوية جاني من يومين من حنان سعيد

ربي ميحرمني منها تفكرتني بتاج


:)

ايه الهمة والنشاط دانت طالب نشيط وبتعمل واجبتك ع احسن مستوي

ايوة خليك هكي يا رومانسي ع طوووول

ممكن يجيك تتويج المدة الجاية مش ناسينك
;)

ماء تشرين said...

لا لا لا
طلعت تلميذ شاطر مش مشاغب خالص
كويس والله احبك وانت مؤدب وبتعمل الواجب شاطر شاطر
اصل معملتش الواجب زى ماانت عارف واظاهر هيفصلونى
اعععععععععع
بس على مين انا طول عمرى مشاغبه
تقبل مرورى
ماء تشرين

حنان الشافعي said...

اجابات جميله مبروك جالك امتيااااااااز
وحلو جو الاجابات يا مستر رومنسي

EMMY BABY said...

احم احم

على فكرة انا متابعة بس مبردش بس مش معنى كدة انك تدبسنى والله ماشى يا رومنسى

بس بجد والله يا رومنسى انا ببقى سعيدة اوى لما بحس انكم فاكرنى ودى عندى بالدنيا كلها

نيجى بقى لاسئلة التاج
عجبنى اولا تشبيهك للتاج بتاج وزارة التربية والتعليم

بس نفسى اعرف ليه فى نبرة حزينة كدة فى كلامك والله انت بتفكرنى بنفسى اوى معرفشى ليه

حتى فى اجابتك على التاج ده نقدر نقول ان معظمها حسيته وصف ليا

بس متحبش السمك كفاية عليك الفراخ :p

وعلى فكرة فى ناس كتير لسة قلوبهم بيضا وصافية ولا بيعرفوا يكدبوا ولا ينافقوا ولا يزوقوا وممكن ده اللى بيتعبهم وبيخليهم متقلبين كدة زى حالاتك

مفروض فى السؤال بتاع اجمل بوست تحط معظم لينكات مواضيعك اصلا

ادعيلى بقى علياااااااااااااااااااااا امتحانات من هنا ليوم 16 |6

ربنا يسعدك يا رومنسى

تحياتى

ايمى

gogo!sf said...

اولا مبروك عليك التاج

اجاباتك اكتر من رائعه لانها دمها خفيف جدا وخصوصا وانت مفكرنى بالاطفال الصغيرين اللى بيجاوبو عشان خايفين من الميسات بتاعتهم فى المدرسه


تحياتى

جوجو said...

السلام عليكم

هههههه

ايه ياعم الاجابات الجامدة دة

تحياتى

* Alwaan * said...

فكرتنى بايام المدرسه والواجب والحاجات دى

اييييييه دنييييا

على اساس انى سايباها بقالى زمن مثلا

ههههههههههههه

بس اجاباتك جميله بجد تسلم ايدك

تحياتى
رودى هانم سابقا ,ألوان حاليا

Tshandny said...

اللي يجاوبه تاجه بسرعة
شو بنقله
شاطر ...........شاطر

احساس طفلة محبة للرومانسية بس واقعية said...

9 / 10

ايوة ايوة عشان اتأخرت فى الاجابة
وفات من الوقت البدل الضائع للاجابة
3 دقائق

هاهاهاهاهاهاهاها
لا بجد بقى اجابتك بتقول انك شخصية بسيطة وهادية مش طالب مشاغب يعنى

الطيبة بجد حتى لو كانت زيادة عن اللزوم هى مش حاجة سيئة بالعكس ربنا يزيدك طيبة ويزيدك معاها حسنات

شكرا على اجابتك
تقبل مرورى

فراشة said...

مبروك عليك التاج يا رومنسى
واضح انك الحمد لله خرجت من الحالة اللى كانت عندك
تحياتى

salwa said...

السلام عليكم
اجوبة رائعة تنم عن شخصية متفهمة
بالتوفيق ان شاء الله
سلام

holyday said...

السلام عليك
كيف حال
حلو تاج والاحل اجابتك
اختك
فتاة من زمن اخر

الفراشة الصغيرة said...

هههههههههههههه

يلا جيد جدا
يا ولد

البرتفولي بتاعك ممتاز
عقبال اخر السنه

بس كده يهون عليك
كفته الرز بتاعتى
بتحب الفراخ اكتر

MaNoOoSh said...

طلعت تلميذ شاطر يا رومنسى والوزارة احتمال تطلعك رحلة لايطاليا بلد الرومانسية
هههههههههههههههه
خليت للتاج جو تانى جميل رجع للواحد ذكريات احلى

شباك موارب said...

عربون صلح ياباشا
هو انت مش كتبت تاج قبل كدا ولا انا متهيالي
بيااااااافو
تعاى يالله ارسملك نجمه كبيره على خدك
وخد يابابا الجنيه ده اشتري بيه اتنين لامبادا دا ليك

e_emy said...

10/10 اكيــــــد

ماشاء الله اجاباتك كلها جميله

mohamed ghalia said...

ههههههههههههههههههههه
حلوه أوى الإجابات

princess said...

ايه الميس المفترية دى ههههههه
كل ده واجب
بس هيا جمبى تبقى ملاك(وش شرير)
عاجبنى موضوع كوباية الشاى ده هههههه

ساره said...

هو مافي غيرك فى الفصل
الميس مستلمتك اسئله
:)

اقولك على حاجه انت فيك خجل
وطيبه واحترام
وفوق هذا كله
ماتحب تزعل احد ابدا

تحياتي يا رومانسي

Soul.o0o.Whisper said...

ايه الردود الدبلوماسية دى؟؟

الظاهر عليك تلميذ مطيع خالص
خالص


فين الطلبة ييجوا يتعلموا منك

بس انت ليه مستقصد الميس معاك فى كل سؤال؟؟
ها؟؟


ههههههههه


بجد اجاباتك جميلة




دمت بود

maha zein said...

ايه يا جماعة فصل اولي تالت ده
الميس معبطتش بعد الليلة دي

طيب...متقلب ...شرير....يبقه دي اعراض حالة فوصام
الحق اتعالج بسرعة

اجابات كلها بسيطة
مكنتش اعرف كتير منها
ذي اسمك ومجال عملك وشخصيتك
اه وربنا

دينا حامد said...

ههههههه عجبني العنوان جدا

جميلة ردودك على الاسئلة
انا اعتقد انك نجحت في الامتحان بتقدير عالي كمان :D

تحياتي

yoyo said...

صباحك سكر يا أرق أمير فى مدرسة الرومانسية

ايه الاجابات الجميلة دى يا قلب المس
انت تلميذ شطور اوى اوى كمان عشان مش بتحاول تهرب من المدرسة بجد مش هيكون لها طعم من غيرك لان انت اللى محليها بجد

ربنا يسعدك يارب و يسعدك قلبك الجميل دا
و بعدين مش كنت عارفة انك لمض كدا يعنى رومنسى و كمان لمض صبرنى ياربى على التلميذ دا بقى هههههههههههه

امممم يعنى كمان مش عاوزانى اسال الطالب اللى نايم جنبك دا يعنى لا دا اولهم بقى انا قولت انت الا هتقدر عليه هههههههههه التلميذ دا عاوز يصحى صح ولا ايه رايك هههههههههه
مش عاوزين كسل بقى يا هندسة

اجابات جميلة اوى يا احمد
ربنا يسعدك ويبعد عنك اى حزن يارب

تحياتى
مس يويو

mahasen saber said...

طب الشاى التقيل غلط ومضر بالصحه

يس ساعة العصارى بتبقى حلوه قوى من غير حاجه اصلا

وبعدين المس يتاعتك دى شكلها مش هتدخل الكادر كده

GiGi said...

هو ايه المدرسه اللى انا جيت فيها دي
طيب اطلع ازاى لازم بابا ياخدلى اذن واخرج
وبعدين بقه فى الحيره دى
بجد بوست هاااايل واجابات روعه

romansy said...

ShiMOo
الله عليكى يا شيمو

مستنى

romansy said...

ShiMOo

حمد الله على سلامتك يا شيمو مود زفت ايه يا بنهاويه
سيبك بس من الدنيا واهربى بعيد عن المشاكل
خدى بالك من مذاكرتك عاوزينك كده حاجه كبيره قوى
ربنا معاكى يا شيمو

romansy said...

صوت من مصر
يا هلا بمحمد بيك
الرومانسيه لا تختلط ابدا ابدا
المهم محتاجين برضه غذاء البطون
ولا ايه

romansy said...

marmar

يا نهار ابيض
سالب مليون يا مفتريه
عقابا ليكى بقى مفيش حمام
ولا عزومه
بس لما اشوفك بس
انا عاوز اهداء خاص مش عامتا كده
وعلى العموم انا جاوبته برضه اهو

romansy said...

marmar
كل سنه وانتى طيبه يا ريمو
انا اكيد حاسس اد ايه مجهودك
فى الاكل
والفرجه على التليفزيون
لا
بتتعبى بجد
الله يكون فى العون

romansy said...

نهر الحب

يا هلا بنهر الحب ايش اخبارك شلونك
فينك من زمان قوى
من بورسعيد
لهنا وهنا
مش عارفين
بتغيبى ليه بس
حمد الله على سلامتك

romansy said...

”*°•.˜”*°•..سونه..•°*”˜.•°*”˜

اهلين سونه ايه اخبارك
كل سنه وانتى طيبه
اقرى براحتك ربنا يخايكى يا سونه
وتحققى اللى تتمنيه

romansy said...

dramaqueen
اهلين بالملكه
نورتى المدونه يا ملكتنا
شكرا شكرا
انا كده هتغر فى نفسى وهضرب الفصل كله

romansy said...

عاشقة الأحزان

اهلا يا ايناس
ايه اخبارك
نعمل ايه فى التاجات بقى
بس كويس تاجك جميل قوى ومتتع

romansy said...

My Hope$
اهلا يا منى نورتى
مدرسين بقى
نعمل ايه
لازم الاحترام
ولازم نقول يا ميس واللى هسقط فى اعمال السنه

romansy said...

Nasimlibya

اهلين نسمه
تتويج تانى
من نسمه
دا شرف ليا
كبير قوى
انتى فينك
مش بتعلقى بقالك فتره
اتمنى تتويج سعيد

romansy said...

ماء تشرين
الصراحه انا خوفت
من المفتريه
اصل اسقط فى درجات اعمال السنه
وانا يدوب على الاد
بس المشاغبه دى مش دلوقتى
لما اخلص واطلع بره المدرسه

romansy said...

حنان الشافعي

اهلا يا استاذه
امتياز انا على كده شطور قوى وهاخد فى نفسى مقلب

لا بالراحه شويه

romansy said...

EMMY BABY
يا مرحبا يا مرحبا
ايمى عندنا
لا لا لا
انا مش مصدق
مين قالك بقى اننا ناسين ايمى
تاج وزاره التربيه والتعليم لان اللى اهدهولى
مدرسين
علشان كده بحترمهم وبقولهم يا ميس بدل ما اتفصل
ربنا يوفقك يا ايمى
بعد الامتحان مستنين التاج
تدبيسه بقى مره من نفسى
انتى يامه دبستينا

ShiMOo said...

romansy

//سيبك بس من الدنيا واهربى بعيد عن المشاكل//


طيب ازااااااااااي !!!
والله كل ما اروح في حته الاقيها ورايا
خلاص تعبت بجد :(( :((


//خدى بالك من مذاكرتك عاوزينك كده حاجه كبيره قوى//

لالالا انا مش عايزه اشتغل :D
انا عايزه اتجوز واقعد في البيت :D

romansy said...

gogo!sf

ياه
ذكريات جميله قوى ذكريات الطفوله
انا كنت بحب الميس بتاعتى اوى
فاكرها وفاكر
كل كلمه ليا
ربنا يخليكى يا جوجو
بشكرك جداجدا

romansy said...

جوجو

اهلين جوجو
اجابات جامده ايه بس يعنى انفع اجيب الدرجات النهائيه
الحمد لله

romansy said...

* Alwaan *

الوان حاليا
خليتى الدنيا لونها ابيض وزى الفل ايه احبارك
الحمد لله ناصع البياض
الوان حاليا

romansy said...

Tshandny

شاطر شاطر

يا سلام
شوفى يا ميس انا بسمع الكلام ازاى عاوز كولاسه هديه

romansy said...

احساس طفلة محبة للرومانسية بس واقعية
اهلا يا ميس احساس
الحمد لله
9/10
كويس
انا اتاخلت بس علسان الكز سويه بس
وعلى ما لوحت دبت كولاسه وقلم

ماسى يا ميس

انا كويس يعنى

romansy said...

فراشة
اهلا بالفراشه
ايه اخبارك
الحمد لله
ربنا هدانى شويه ورحمنى من اللى كنت فيه
الحمد
لله

تحياتى

romansy said...

salwa

اختى سلوى
انا مقصر معاكى يا سلوى انا عارف
سامحينى

romansy said...

holyday

هوليدى الرقيقه
ايش اخبارك
ايش احوالك
باهى باهى

كله كويس يعنى
شوفى انا ليبى ازاى

romansy said...

الفراشة الصغيرة
صباح الخيل يا ميس
هييييييييييييييييه
انا دبت ممتاز
سقفه كبيره يا اولاد
هيييييييييييييه
ايه يا ميس
هو احنا فى حصه تدبير منزلى
ولا ايه
بحب الفراخ بقة

romansy said...

MaNoOoSh
يا هلا بالغالى
منوش
يا منوش
اطلع من الفانوش
الجو هيبقى احلى مع الحبايب يا منوش
انا عازمك معايا
نعيش بعيد فى ايطاليا البلد

او فى المنيا القمح
موافق

romansy said...

شباك موارب
ههههههههههه
انتى كريمه قوى
جنيه بحاله
اتنين لمبادا انا بحبها ايه اللى عرفك
اانا موافق ترسمى نجمه كبيره
بس هقول للميس
ومعرفش هتعملى ايه

romansy said...

e_emy

ايمى
نورتينى انا كده هاخد فى نفسى مقلب
خلاص بقى انتى هتبقى الميس طالما هتدينى الدرجات النهائيه

romansy said...

mohamed ghalia
السلام عليكم
يا محمد السعاده شئ جميل قوى
يرب نبقى سعداء على طول

romansy said...

princess
وشهد شاهد من اهلها
شوفتى بقى الميسات بتعمل ايه
اوعى تكونى بتعملى كده فى عمر
احسن يطفش
هههههههه
نورتينى يا اميرتنا

romansy said...

ساره
اهلا يا ساره
هنعمل ايه فى الميس بقى لازم اسمع كلامها
والا
انتى عارفه
ربنا يخليكى يارب
بشكرك على الكلام الجميل
تحياتى

romansy said...

Soul.o0o.Whisper
اهلا يا دكتوره
الميس اللى مستقصدانى
اعمل ايه
الحمدلله
عدت الاسئله وخد اعمال السنه
ربنا يخليكى
وشكرا على زيارتك
وتعليقك

romansy said...

maha zein
انا اللى عاوز اتعالج
فقدتى الذاكراه ولا ايه
ربنا معاكى يا مها
لا حول ولا قوه الا بالله
انتى كنتى كويسه
يلا شوفلى دكتور كويس
ليه وليكى

romansy said...

دينا حامد
يا هلا يا دنيا
العنوان بقى
علشان المدرسين
شكرا على تعليقك
يا دنياونورتينى

romansy said...

yoyo

صباحك سكر الاسره ابيض وزى الفل
تلميذك يا ميس
لازم اتعلم حاجه صغيره من الميس
مقدرش اهرب عن المدرسه يا ميس وانتى فيها برضه
بغازلك يا ميس
بس متقوليش للمديره
هههههههه
يارب يسعدنى ويسعدنا جميعا يارب
اتعلمت اللماضه بقى يا ميس من الميس برضه
مسبتش حاجه خالص كله اتعلمته
وبعدين بقى
سيبه نايم يا ميس دا منمش بقاله تلت سنين
هههههههه
شكرا يا ميس على التاج الجميل

romansy said...

mahasen saber

اهلا يا سياده المديره

ساعه العصارى دى ساعه جميله قوى قوى
لون الشمس يبيبقى لونه ذهبى جميل بحس فيها بكل شئ جميل
الميس بقى مش هتدخل الكادر علشان هى بس اديتنى اسئله كتير
اشتكيها يا مديرتنا
مستنى

romansy said...

GiGi
هههههههههههههه
بابا مش هياخد اذن ولا حاجه فيه فتحه فى السور اللى ورا الفصول
اخرجى منها براحتك بقى
الهروب اوقات بيكون لذيذ وبالات لو الحصه حصه العاب او رسم

romansy said...

ShiMOo

ليه بس كده يا شيمو
احبسيها بقى
فى حته
ولا اقولك اخرجى وغرقيها فى النيل
الف سلامه عليكى يا شيمو
انتى قلبك طيب واكيد ربنا هيساعدك
مش عاوزه تشتغلى يا كسوله
عاوزه تتجوزى
هتلاقى ابن الحلال
بس دا هيبقى ملاك
خدى بالك منه

kochia said...

مين الي سماه تاج التربية والتعليم ؟
انت عاوز درجات علي الاجابات يعني ؟

طيب اجابات كويسة
حلو

تحياتي

صدى الصمت said...

ياااه أول مرة أقرألك تاج
الحقيقة إجاباتك جميلة ولذيذة وصادقة
بس مش عارفة لية بتحب الشغل ؟؟
أول مرة أقابل حد بيحب الشغل دة إنت عملة نادرة
مش قادرة أوصفلك شعورى الصبح وأنا صاحية رايحة الشغل
بأكون عاملة زى ال رايحة معتقل
هههههه
ربنا يوفقك ويسعدك
تحياتى


عاشقة الورد

منى said...

طريقه اجابتك عجبتنى اوى
فكرتنى بايام المدرسه
ويالها من اياااام
كل تاج وانت طيب و بخير

dalia said...

تحياتي يا رومانسى
حلو شو المدرسة والتلاميذ اول مرة اشوف تاج بلون الاستيكه والبراية والكراريس
تستحق 10 على 10 في الامتحان
ونجمه كمان
:)
دمت بخير شكرا على الكلمات المشجعه في مدونتي

Shimaa Esmail said...

السيد الأستاذ/ أحمد الدسوقي.
صاحب مدونة / رومنسي
" تحية طيبة" وبعد..
اعتذر عن الخروج من موضوع التدوينة، لقد أرسلت لك رسالة عبر البريد الإلكتروني تتعلق باستمارة استقصاء بيانات عن المدونات المصرية. وهذه ثاني مرة أقوم بإعادة الإرسال على إيميلات الموضحة في ملف تعريفك.
أرجو الاهتمام والرد سريعا بالموافقة أو الرفض. وعدم التجاهل خاصة وأنك قلت أنك سترد ولم يصلني منك رد بالموافقة أو الرفض.
تحياتي وتقديري.
شيماء إسماعيل
باحثة بالماجستير- كلية الآداب جامعة القاهرة.

قلب ارهقته الاحلام said...

يختي قميله عليها ف المريله :)

ايه الاجابات الجامدة دي بس احنا خبينا الخرزانه عشان مش تخاف :)

بجد إجاباتك واسلوبك جميل

تحياتي ليك,,,

ندا منير said...

ايه البلطجة دى
ههههههههههههههه
حد يرد على المدرسة كدة

هههههه
ربنا يوفقك يارب
وتحقق كل احلامك

may said...

السلام عليكم

ميوش عادت تسلم على رومنسي

وبقوة

وخيتك مى

romansy said...

kochia
اهلا اهلا باقصاصيص
احسن بعيد عنك التاج دا جالى من مدرسين
وانتى عارفه المدرسين بقى
الله يكون فى عونا

romansy said...

صدى الصمت
نورتينى
الحمد لله انك شوفتيلى تاج
انا بحب الشغل لانى اوقات كتير ممكن يخرجنى من اللى انا فيه
بس اوقات اكتر بيخلينى كئيب
وبيتعب اعصابى

كيــــــــــــارا said...

اجاباتك جميله يااحمد

وحلوه طريقة الاجابه

romansy said...

منى
اهلا اهلا باجمل احاسيس
نورتى الدنيا كلها
وشكرا على انك لسه فاكرانى

وفاكره ايام المدرسه الجميله

romansy said...

dalia
اوقات كتير بحب ارجع طفل تانى
ايام الطفوله كانت اجمل ايام
انتى تستحقى اكتر من كده بكتير

ربنا يوفقك

romansy said...

Shimaa Esmail

اهلا بيكى يا دكتوره
انا اسف انى مردتش المره الاولى بس دا كان غصب عنى
المره دى انا موافق
مستنى

نورتينى

romansy said...

قلب ارهقته الاحلام
ههههههه
هى فيها خرزانانه يبقى هبلغ فيكوا يا ظلمه
يا وحشين
نورتينى

romansy said...

ندا منير
الصراحه بقى يا ندا
مدرسين اخر زمن
اتارى الجيل فاشل

انتى مشغوله قوى كده
مش عارفين فينك

romansy said...

may

اهلا بمى
نورتى الدنيا

حمد الله على سلامتك

romansy said...

كيــــــــــــارا

اهلين بكيارا
شو احوال البلد
انتى مالك بقى
اتحسدتى وزلا ايه

جــــوه القـــلـب said...

هاى ازيك ايه الاجبات الجامده دى تاج حلو اوى جديد اول مرة ينزل السوق انت دايما بيكون عندك الجديد ...rock.....

كيــــــــــــارا said...

شكلي كدا

عاااااااااااااااااااااااااااااااااا

شمس النهار said...

الحقيقه التيجان دي علي قد ماهي متعبه بس بحس انها بتقربنا من بعض اكتر وبتعرفنا بعض اكتر
وخصوصا لماتكون اجابات لطيفه زي اللي انت مجاوبها

norahaty said...

الله يارومنسى
كنت فاكرة نفسى ألفة:(
طلعت انت ألفة الالفات كلهم
بجد طريقة جديدة وجميلة للاجابة على
التاج اللى دوخ المدونين كلااااااااتهم
بما فيهم اللى بتكتبلك الان
انا يعنى:)لو مش واخد بالك
!!ايه رومانسى انا هنا بتبص فين

romansy said...

جــــوه القـــلـب
ههههههههههه
لدرجه دى يعنى مش جديد ولا حاجه انا لسه يدوب بنحاول نرجع زى الاول
بشكرك على تعليقك وذقك

romansy said...

كيــــــــــــارا
ليه بس كده يا كيارا
خلاص بقى بلاش عياط غرقتى المدونه وانا لسه عامل لها صيانه

انصحك اخرجى واتفسحى مع اقرب الناس

romansy said...

شمس النهار
اهلا يا شموسه
انتى كده اللى بزيارتك خليتى المدونه ليها روح

نورتينى يا شموسه

romansy said...

norahaty

ههههههههه

الفا ايه بس يا نورا
انا شايفك طبعا
ازاى بقى مخدش بالى من اللى المدير مزعلها

norahaty said...

هو مزعلنى انا بس؟
دا مزعل الكفر قصدى:)
:)الفرع كلاته يارومنسى

Little Lady said...

كل تاج وانت بخير ان شاء الله
:D

فتاه حالمه said...

انا جه
عووووووووووووو
هو ايه حكايه التاج ده منتشر اليومين دول
لا حول ولا قوة الا بالله العلي العظيم
كويس انه بعيد عني
بس اجاباتك حلوة بس انا لو من المدرسات بتوعك
اديك 5/5000
ومش تسال ليه
هي كدا رخامه
ههههههههههههههههههههههههه
لا بجد حلوة
ربنا يوفقك
سلام

romansy said...

norahaty

ههههههههههههه
معلشيا نور
ايوه كده خليكى فريش ولا يهمك

بكره تروق وتحلى
والتزويغ يبقى على ودنه

romansy said...

Little Lady

نورتينى
كل سنه وانتى طيبه
ويارب تنورينى تانى وتالت بالزياره

romansy said...

فتاه حالمه

ههههههههههه

يا نهار ابيض رخامه وخلاص
بس انا هكون مبسوط برده
لان رخامتك زى العسل
خلصى بقى الكورس الجملى دا
وفوقى

Bola 7elmi said...

هههههههههههه ,, لبق لبق لبق ,, فـ اجاباتك ع الميس
بس هيا الميس دي جديده عليك ولا فاقده الزاكره ,,
بس حلو انها فاقداها .. م خلتنا نشوف احلى كلام وردود .. ونعرف رومنسي فـ اول زياره لياه ف بلوجو
بجد ,, وااااااااااااااااااو البوست دا

:)

romansy said...

Bola 7elmi

اهلا اهلا اهلا
نورينى جدا جدا
اعمل ايه بقى تفتكر مين ولا مين
الكلاس كله بتنسى اساميهم برضه
بس فاكرانى
يلا بقى
عدى على خير