Friday, April 8, 2016

كُبى مَيَه



كُبى مَيَه حَبه حَبه
وصبى ليا العشق صَبه
كل نقطه ميه منك 
تروى روحى تزيد محَبه
كُبى مَيَه واعشقينى
وبحنانك غسلينى
زيدى اشواقى وحنينى
واوعى شوقك يستخبى
كُبى مَيَه بلى ريقى
طفى اشواقى وحريقى
من زمان انا نفسى اقولك
ان كفه عشقى طبه

Monday, April 4, 2016

شوفتك احساس


شوفتك احساس غير كل الناس 
شوفتك بعيونى احسن منهم
ومهما تكون على اى اساس
انا راضى بعشقك كده عنهم
انا راضى اكون اسم ف ورقه
او حتى يدوب حرف ف رقبه
وكفايه نعيش الحب خلاص
وكفايه العشق مجننهم
‪#‎Ahmed_Eldesuki‬

Saturday, April 2, 2016

يا خجلانه


يا خجلانه وخجلك دا مدوبنى
اقول البت تقلانه وتقلك دا مجننى
اقول يمكن ف يوم هتحن
بلاقيها تدوب من الشوق و تسحرينى
يا خجلانه يا رقه يا خفه ظل
يا شجره توت هنا طارحه وكلك ضِل
الف بلاد واجى الضل تحتيها
يا اغلى الناس وحبى ليكى ورد وفل
‪#‎Ahmed_Eldesuki‬

Friday, April 1, 2016

انت مالك


سالونى بكل جرئه
عملت ايه ف حياتك؟
قولتهم يعنى فارقه
ياعم وانت مالك!
عملت حاجات كتير
متهمش حد غيرى
عملت الناس بخير
واحتاروا ف خط سيرى
حافظت ع اللى غابوا
وبحب اجيب سيرتهم
ومهما بعدوا سابوا
ونرودلهم.... غبيتهم
لعبت مع العيال
وضحكت كمان معاهم
وبنيت من الرمال
خيول وجريت وراهم
وسرقت الفرحه سرقه
سألونى بكل جرئه
عملت ايه ف حياتك؟
ياعم وانت مالك!
#Ahmed_Eldesuki

Monday, March 21, 2016

عيد الام


بيقولوا عيدك النهارده
هو عيدك له ميعاد
انتى نسمه جميله بارده
انتى ميه انتى زاد
انتى ياما اكلت اكلك
انتى ياما شربت شربك
احضنينى بقوه يا امه
طفى شوق جوايا قاد
انتى نسمه وقت ماتكون دنيا حر
انتى مركب عدى بينا لاحلى بر
انتى فرحه مليا قلبى ويبعد عنك كل شر
انتى ساكنه جوه قلبى انتى شوق قد البلاد
مهما اكتب مهما اوصف مش هوفى ف يوم جمايلك
مهما اديلك عيونى مش هنعرف نعمل عمايلك
انتى جنه عايشه ارض
انتى حنه وحنان وورد
انا كنت ارض بور
وبيكى بس اتمليت حصاد
بيقولوا عيدك النهارده
هو عيدك له ميعاد

صباح الخير يا حبيبتى


صباح الخير يا حبيبتى
ياغاليه ياللى كبرتى
اروح منك سنين وانتى
انتى ف الارض نبتى 
احبك ياغاليه يا امى 
ياللى انتى ف قلبى تبتى
صباح الخير على حضنك
يلم العيله ويساعنا
صباح الخير على قلبك
يشيل بحلاوه اوجاعنا
صباح الخير على امى
على الجنه اللى تجمعنا
يا غاليه تطبطى تضمى
ورب الكون دا يسمعنا

Thursday, March 10, 2016

امراه واهيه

لَا أُرِيدُ أَحَاسِيسَكَ الْعَــالِيهْ
وَلَا أُرِيدُ رِقَـتَكَ الطَّـاغِيهْ
بَلْ أُرِيدُ قُـوَتَـكَ الْخَـافِيهْ
أُرِيدُ تَغَْـيِرًا فِيِ حَيَاتِى
أُرِيدُ أَنْ أُخْـرِجَ آهَـاتِى
فلَاَ تْعَاملِْنِى مِثْلَ لُؤْلُؤْةٍ غَـالِيهْ
فَقَدْ مَلِلتُْ مِنَكَ الْمُعَامَـلَه ْ
مَلِلتُْ تِلْكَ الْمُجَامَلَهْ
أُرِيدُ فَقَطْ اْلقُوهْ الْخَـافِيهْ
فَأطْلِقَها عَلَى عَنَانِ وَجْـهِي
فَأطْلِقَها عَلَى عَنَان جِـسِمِي
فَإِنْىِ اصّْبَحْتُ امْـرَاةٌ وَاهِـيهْ
أَتـُرِيدِينَ أَنْ اَطِْلقْ قـُوَتِى
فَانَا لاَ اُحـْبُّ اَنْ اطْلِقُهَا إلاَ لِدفَاع ُعنَـْكِ
حبَيبَتِي
لاَ أَنْتِي امْـرَاةٌ نَاشِِذْ
وَلاَ يَومًا خَـرَجْتِى عَنْ طـَاعَتي
فَأنَا أرَاكِـى وَرْدًَا أْرَْوِيـهَا
وَلاَ أَراَِكِى أَسـَدًا اُرَوِْضُـه ْ
فَاُخِـرِجَ عَلَيَهِ قـُوَتِى
فَلاَ تَجَْـعَليِنى اُذِيقُكَِِ قَسَْوَتِى

Wednesday, March 9, 2016

تعويذه

مش حب حبيب لحبيبته
ولا حب صديقه عزيزه
ولا حب دا أب لبنته
ودفينشى ...للموناليزه
حبها معجون متلخبط
معجون ميه عفاريت
والقلب يشوفها يخبط
وينط قوام... تنطيط
ومجرد ما ابقى فاكرها
تخرجلى قوام م الحيط
هو انا حبيت جنييه
ولا انا قريت تعويذه

Tuesday, March 8, 2016

كلمه اتقالت


واهى كلمه خلاص بينا اتقالت

معلش دا كات غصب عنى
والدمعه من عينك سالت
ودموعك دى هتجننى
لو كنت جرحتك فانا عارف
ان انت بطيبتك تسامحنى
واهى كلمه خلاص بينا اتقالت
والله دا كات غصب عنى
طب ليه هندخل ما بينا 
واحد كده يحكم بينا
ويكون ف حياتنا واحد تالت
ما كفايه الحب دا ف عيونا
وايه يعنى لو نزعل ثنه
وهمومنا تكون بينا اتشالت
واهى كلمه خلاص بينا اتقالت

Monday, March 7, 2016

حبيبه الروح


طب اقولك انتى ضلى 
انتى كل شئ فاضلى
انتى سندى وانتى خللى
انتى قوة ف وقت ذللى
انتى حتى مخلوقه منى
انتى بنتى وانتى امى
انت حتى تشيلى همى
طبطبى بايدك وضمى
زيلى تعب الدنيا عنى
يا حبيبه الروح تملى 

Sunday, March 6, 2016

ضحكتها ودموعها


ما بين ضحكتها ودموعها
مسافه جزء م الثانيه 
وبين الدمعه ورجوعها
سحابه تغيم الدنيا
خلاص دمعتها اهى قالت
كلام مخنوق
موسيقى حزينه ع المشهد
وحب وشوق
خلاص ضحكتها اهى بانت
وبكره تروق
واشوفك فارده جناحتك وبتطيرى
وبتطوفى كماالفراشات
يا اجمل بنت حسيتها ومين غيرى
هيقدر يوصف الملكات
وافرحى وف رحمه ربنا سيرى
دا عند ه الحب والبركات

Saturday, March 5, 2016

عينك لعنيه


عن نظره عينك لعنيه
قالتلى كلامها بحنيه
ولما لمست انت ايديه
انا روحت بعيد
انا وانت وبس لوحدينا
وشعاع الشمس مدفينا
وكاننا احنا لبعضينا
والقلب سعيد
النظره ف عينك بالدنيا
وكفايه عنيك
ولا اى مكان يحلا ف عينى
الا غير بيك
ف عيونك انا شوفت بلاد
وف قلبك حبنا اهو زاد
وخلاص انا دوبت انا فيك

Friday, February 19, 2016

محتاجك تبقى الاوطان


محتاجك حضن يكون اجمل من لمه عيله
محتاجك نظره تكون اشمل لاصغر تفصيله
محتاجك دعا .....وحنان........ وايمان
مجتاجك ذكرى تكون ليا ف كل الاركان
محتاجك فرحه تملى القلب والحزن تمحييه وتشيله
انا عايزك بنت كده ارسمها والرسمه جميله
واعشق كل تفاصيلها ومتغبش ف ليله
ومهما الف انا وادور انتى اللى اميره
واعمل ايه انا ف قلبى ما بيدى انا حيله
انا عايزك بس تكونى انتى ف القلب اسيره
وابنيلك عش انا صغير واغزلك بايدى الفستان
واعزفك اجمل الحان وادندن ع العود وكمان
والزغاريد تكتر وتلالى والافراح ف كل مكان
تعرفى انا محتاجك ايه؟
محتاجك تبقى الاوطان

Thursday, February 18, 2016

صوتك رقيق

صوتك رقيق
قلبك.... برئ
كلك ..مرح
عشقك جميل
غصنك يميل
وردك طرح
احساس ملاك
شايفك هناك
رمشك سرح
بنت بضفيره
عيون كحيله
سهمك جرح
طفله بريئه
بنت جريئه
فستان فرح

Monday, February 15, 2016

بترجاك يارب


انا العاشق انا الولهان 
انا اللى قلبى حب زمان
ومن نظره اروح طبيت
انا القلب اللى كله حنان
اناالعشق اللى بالامكان 
وانا لكل البنات حبيت
انا الطفل اللى شاب بدرى
انا الراجل دا من صغرى
وانا لكل الالام خبيت
انا الزهره اللى ف الواحه
انا الشجره اللى طراحه
وانا بكل الوجع حسيت
انا الميت انا الصاحى
انا القهوه ف افراحى
وانا للفرح اتمنيت
انا ف الاولى والتانيه
عرفت ان الحياه فانيه
ولرحمه ربى اترجيت

مسابقه همسه 2016

Sunday, February 14, 2016

يا محلى الحب

يا محلى الحب وانا جنبك وحسانى 
يا مالكه القلب يا ماليه كل وجدانى
يا ساكنه الروح وحبك جوه شريانى
بحبك حب يا غنوه تمللى عجبانى

Saturday, February 13, 2016

كل شويه بوش


انسان وعايش دنيته
ولا حد عارف علته
كل الحكايه ف سكته
عقبات كتير
عمال يدور ع الحلول
وسر بابه المقفول
وفكره حلوه ف العقول
ترحمه من التفكير
لغايه لما صاحبه نداااه
وقاله ايه سر الحياه
عارف المر اللى شربناه
احلو كتيير 
السر بس ف كلمتين
انك تبقى كده بوشيين
انك تضحك وقت الضحك
وانك تبكى بدمع العين
واياك تنسى ان انت تغش
واظهر كل شويه بوش
تلقى الهنا والخير جاينلك
تلقى الفيل جايلك طير

Wednesday, February 10, 2016

تتكلمى ببرود


بلاش رودود تكون ببرود
اصل انا قلبى مش موعود
انه يعيش العمر سجين
يظهر فرحه لو انه حزين
قلب اتحجر على ابديك ولا بيلين 
طفل صغير شاف الدنيا بقلب برئ
خاف م الدنيا جرى على حضنك
ولا يعرفش له اى طريق
كان فاكر قلبك موجود
فبلاش تتكلمى ببرود

احساس سخيف


طب استنى بالله عليكى
ليه تسيبى قلبى الضعيف
قلبى عاش ربيعه ليكى
ليه تخلى بقيته خريف؟
ماهو دا القلب اللى حبك
بكل رقه وباخلاص
هو دا القلب اللى كانلك
انتى بس اعز الناس
ليه تسيبى القلب فجأة ؟
انتى عماله مفاجأة !!!
اللى باعنى خلاص ابيعه
وحبى دا احساس سخيف

قربه عباده


ليه الحزن تملى دا عاده
وليه الجرح ف ايده اتماده؟ ؟
كل ما افرح القى قصادى 
جرح وشوك دايما كالعاده
زى ما اكون الحزن اتعود 
يبقى الساقيه وقلبى قصاده
امتى يا حزن تبعد عنا
وتخلى الضحكات معتاده؟
- الحزن
ابعد عنك بس ازاى
انت نصيبى وشوق وياى
ضحكك حزنك دا لا هو بايدك
اسأل ربك يفرج همك دا قربه يريدك
هو القايل جوه كتابه
ادعى لربك تلاقى الدعوه ف قربه عباده ّّ

يبقى الله اعلم بعباده

Monday, February 8, 2016

زوقى بابى


زوقى بابى وادخليه
كسرى كل اللى فيه
وان قالولك ايه جرالك
اوعى لحد تسمعيه
كسرى كل الهدايا
احرقى حتى الورق
لناس اصلا مش معايا
وعمرى اهو منى اتسرق
عاوزك انتى تعوضيه
وان قالولك ايه جرالك
اوعى لحد تسمعيه
ابنى بابى من جديد
كل شئ يكون باصوله
عيشينى اكون سعيد
خلى كل شئ انوله
حللى بابى وانقشيه
وان قالولك ايه جرالك
اوعى لحد تسمعيه

Saturday, February 6, 2016

توبه


عايش كما المجذوب تايهه ف ارض الله
نفسى اروحله واتوب وانول بكرمه رضاه
افضل انا مستحى ودموعى سبقانى
وجسمى الضعيف ارتعش وحن يوم يلقاه

Wednesday, February 3, 2016

بلوره مسحوره


ومهما نمسح الصور صورتها محفوره
ومهما تبعد بعيـــــــــييد تمللى مشكوره
غيرت جوايا حاجات قاسيه تضييعنى 
وكأنها شايفانــــى فــــ بلوره مسحوره

Saturday, January 16, 2016

حبيبته العسولا


انا نفسى اقولك يا حبيبتى
انا نفسى اكون فيكى السارح
وتكوني لى اختى وبنتى
واكون لك بكره وامبارح
انا عارفك ان انتى صديقه
والصاحب بيقدر صاحبه
وتفرحى قلبى ف الضيقه
والفرح على وشى رسمته
انا اكتر انسان ف الدنيا
نفسه يضمك بين احضانه
ساعتها تعدى الساعه ف ثانيه
وتدوقى دا طيبته وحنانه
وتكونى حبيبته العسولا

مبقتش فارقه

مع اننا من بعض مقربين
بس حسك ..مش معايا
كنت فاكر روحنا واحده
كنت فاكرك.. حته منى 
طلعتى زى ...اى واحده
اى واحده ....غريبه عنى
انتى حسيتى ف مره
انى بتوجع ليلاتى
مستحيل اكون مبين الا فرحه
طب ف يوم هنت عليكى
تسئلى
هو ليه عيونى سارحه
طب اقولك .......... اقفلى
خلاص حياتنا مبقتش فارقه

Monday, January 11, 2016

صوره

عن جمال الصوره ديه 
عن جمالها معرفش اعبر
الضحكه فيها مش عاديه
خلت قلــــــبى تاه وفكر 
هو ليه بنبان ف صوره
احلى ناس وبصفو نيه
والسعاده اللى ف عينينا
تملى كل الكون حوالينا
والحقيقه صعبــه جداا
والاحلام دايما مكسوره
ياريت حياتنا تبقى صوره

عايشه مخدوعه



عن بنت طول العمر عايشه مخدوعه
لما تلاقى ابوها بقى خالها
طلعت خلاص من فرع شجره مقطوعه
ولا هى دى الام اللى بتضفر شعورها
عاشت سعيده فى عمرها
طول عمرها البنت البريئه
واما كبرت قــــالها
ان هى دى الحقيقه
انا ابقى خالك وامك ربنا رحمها
تعبت قوى لما قالولها دا الخبر
وكأن سهم ف قلبها شقه الهوى كسره القدر
على رجلها قامت ومشيت خطوتين
قالت هكمل وهحقق حلم السنين
ومهما يحصل دا قدرى
واحنا امه موحدين
واحنا امه موحدين

Sunday, January 10, 2016

العجوز والاميره


ف البدايه احب اقولك ايه جرالى وايه حصللى 
هى نفس حكايه كانت للعجوز اهو نفس سنى
يوم ما قابل الاميرة يوم ما تاهت من حرسها 
وقتها ما بيده حيله مكتوب يرجعها لناسها 
يومها كان الدنيا ضلمه والقمر ف السما مخفى
والاميرة خايفه جدا قالها بس انتى اهدى
ايه يا بنتى ايه اللى جابك وسط غابه
والديابه ف كل حته اعمل ايه انا ف الديابه
قام مطلع سهم كان على دهره شايله
سهم واحد طب وايه اخره عمايله
والاميره ف حضنه جامد قالها اوعى تخافى
انتى قلبك قلب طيب واحنا لينا رب كافى
قام مولع ناار كبيره
قالها انتى الاميره
يعنى خليكى ف مكانك
انا رايح اضرب الديبه عشانك
انتى نور الكون دا كله
وانا ليكى قلبى ماله
قلبى عطشان للحنان
قلبى حب دا المكان
بس عشان انتى فيه
طب قوليلى اعمل ايه
قلبى حبك يا اميره
بس عاوزك فيه اسيره
ومتخفيش قلبى نفسه ف يوم يعيش
يلا بينا نروح لقصرك
يلا قلبى بجد حسك
والنهار هل علينا يلا بينا

Thursday, January 7, 2016

طوق نجاه


ولما اسمع انا صوتك
احس الدنيا بتغنى 
يا اجمل صوت انا سمعته 
بعيش العمر متهنى
بعيش صابر على حرجى 
بحارب ظلم الايام
بعيش مستنى يوم فرحى
لما تقولى بس سلام
انا عاشقك ومعشوقك
انا م الدنيا دى طوقك
انا السابح ف بحر حياه
ومهما اروح وتروحى
حبك ف قلبى  وف وروحى
 دا حبك ليا طوق نجاه

Wednesday, January 6, 2016

بعشقك

انا كنت عاوزك بقى قوام تداوينى
يا قلبى شوقك لقا وهواك محلينى
لو غبت عنك دا قدرى ومعاك هنا سنينى
يا اجمل عشق انا عشقته دايما قصاد عينى

Friday, January 1, 2016

يا اجمل عشق


عشقتك
وعاشق كلمتك انت
يا اجمل عشق
اغنييلك
هقول غنوه
بتملى الكون
وانا السابح
ف تفاصيلك
واغنيلك
واقولك احلى موالى
وخلخالى اهو يزينك
ولا بعرف وانا جنبك
اقولك غير انا بحبك
ونن عنيا يحكيلك
وبلمحها انا ف عينك
وسيبك م اللى حسدينك
مانا الحلم اللى هيزينك
واضحى بعمرى علشانك
ونجم الكون اهو جمالك
وتترسمى كما جنينه
واشوفك ورده ف البستان
اشوفك نهر كله حنان
واوصف مهما انا اوصف
مبعرفشى
ولا اقدرشى انا امشى
غير وانتى الحب اللى مايروحشى
انا حبيبك

Wednesday, December 23, 2015

يا رسول الله أجرنا


يا رسول الله أجرنا
يا رسول الله أجرنا
يا رسول الله أجرنا
الغوث رسول الله
الغوث رسول الله
أوقفت العمر عليه بمديح بين يديه
فوضت الأمر إليه فاختار لي رسول الله
يا رسول الله أجرنا يا رسول الله أجرنا
الغوث رسول الله الغوث رسول الله
ومدحت بطيبة طه ودعوت بطه الله
أن يحشرني أواهَا بلواء رسول الله
يا رسول الله أجرنا يا رسول الله أجرنا
الغوث رسول الله الغوث رسول الله
ووقفت على الأعتاب وبكيت له بالباب
وبصفح دون عتاب قد جاد رسول الله
يا رسول الله أجرنا
يا رسول الله أجرنا
الغوث رسول الله
الغوث رسول الله
وشكوت إليه ذنوبي فاستغفر لي محبوبي
ورجعت بدون عيوب من عند رسول الله
يا رسول الله أجرنا يا رسول الله أجرنا
الغوث رسول الله الغوث رسول الله
هللت له تهليلا كم كان الصفح جميلا
داوى قلبي العليلَ ترياق رسول الله
يا رسول الله أجرنا يا رسول الله أجرنا
الغوث رسول الله
الغوث رسول الله

Thursday, December 17, 2015

وسمعت ضحكتها


وسمعت ضحكتها بتلالى ف العالى
يارب خليها ....واسمعها طوالى
انا ليا مين غيرها احكيلها تحكيلى
هى اللى حبيتها واهى ليها مين غيرى
هى اللى حفظانى لما احاول اكدب
عجنانى خبازانى ومعاها بس احسب
عمرى وحياتى محتاج انا اشوفها
وتضم احساسى محتاج لضحكتها
اسمعها طوالى ...والدنيا ساعتها
دايما بتحلالى ..دايما بتحلالى

Wednesday, December 16, 2015

فى عينيك الحياه

ورأيت فى عينيك الحياه وفى يديك الامان.. فتمسك بى ولا تفلت يداى.. فأنا اريد الحياه والامان

Tuesday, December 8, 2015

صباح جنه


صباح شتوى ونسيم بارد
على الناس اللى جوه القلب
صباح يفرق مع الواحد
ويملى الدنيا حب ف حب
صباحك حته من الجنه
وليه يا حبيبتى نتعاند
بلاش عينيك ونظرتها
انا خوفى عليك زايد
وليه تقسى وليه اقسا
وانا شوقى اليك قايد
بلاش البعد وكفايا
تعيش العمر واتمنى
وتضحك احلى ضحكايا
واعيش العمر ف الجنه
والحب ما بينا يكون سايد

Friday, December 4, 2015

اياك تفكر فى الماضى


احمد ازيك اخبارك ايه الاحوال
انا دايما بقرا ف اشعارك حزينه ليه اومال ؟
بتفكر ف الحب الاول ؟ ما تسيبوا ف حال
اهو ربنا خدلك كده حقك شوفت اللى اتصاب
م انا ياما نصحتك ونصحتوا تبعدوا عن بعض
وبعدتوا واهى روحك كسبت وقضيتها بود
فكر فى ايامك اوم عيشها من غير ما تغش
فكر ف حبايبك واخوانك من غير دا الوش
واياك هتفكر فى الماضى ابدا ياجميل
انا عاشق صدقك وكلامى لك بس دليل
اانساه واهو حاول بالمره تصفح وتميل
علشان الصبروايامه نبراس بيشيل
الروح الحلوه وجمالها هى الاسباب
هتعيش وتكتر احلامك وف وسط احباب