Saturday, April 24, 2010

خلاص مسافر


غبت عنك سنين كتير ورجعتك
زاد فــــ قلــبى ليــكى الحـــنين
بس لما رجـــعت ليه مستغربك
هوانتــى مصـــــر؟ ولا انتى مين؟
ولو انتــــى مصـــــــر ودا نـيـلك
يبـــقى لــيه العطــــــشانين
ليـــه وشوش الناس متـغيره
وجــوه عــــــيونهم ليه حزين
دول اللــــى عــابروا القنال
دول اللــــى هـــدوا الجبال
اومال ليــه كده شــــاردين
ياترى شـــايلين همــومك
ولا لهمـــوهم هما شــايلين
طب ايه يا مصر اللى جرى
بقى همـــا دول المــصريين
اللى اتحــــكى عنهم كتير
واللى انكــــتب فيهم اساطير
يا ترى هــــيفوقوا إمتى
ولا هيفضلوا كده تايهين
فين العلــما وفين الادباء
ولا الفن فيه شـــــاطرين
انا هرجع تانى يا مــصر
لغايه لما اعرف انا ابقى مين

36 comments:

حياة said...

اول تعلييييييييييييق

حياة said...

عندك حق
والبوست دة بينطبق علي اوي
انا اصلي عايشة برة
وكل سنة بازور مصر
واسأل نفسي فعلا
هي دي مصر اللي نفسك ترجعيلها و تشوفي اهلها الجدعان الطيبين
تسلم ايدك

ستيتة said...

المصريين من كتر توالي الطرق عليهم لتحويلهم إلى أواني المستطرقة
فقدوا القدرة على تحليل هم ليه بقوا كده
كنت بشوف يوتيوب للملك فيصل إمبارح
استغربت جدا
بقى لنا كتير جدا ما شفناش رجالة زي ده الله يرحمه
والله كنت قربت انسى شكل الزعماء ربنا يخلي اليوتيوب
ده بمثابة متحف لأخر الرجال المحترمين

منــار فايد said...

احمد
خروج غير مالوف عن الرومانسي
حكيت حكايه بلدنا باختصار
تحياتي لقلمك

ندا منير said...

انت مصرى زى ما انت

بس مصر الى مبقتش مصر

حاسس انك غريب بس مش عشان انت بقيت غريب دا عشان مصر هى اللى بقت غريبة

Tshandny said...

ان الله لا يغير ما بقوم حتي يغيروا ما بانفسهم يا احمد
احنا اللي اتغيرنا ومصر زي ماهيا
لما تصحى من نومك و انت رايح تدي شوة
ولما تركب مواصلة وانت عارف انك ممكن تتنشل
ده مش عيب في مصر
ده عيب في المصريين
احنا اللي عملنا في مصر كدة
تحياتي لبوستك الجميل
اللي خلة مصر تصرخ

هوبتي said...

راااااااااااااائعه جدا جدا جدا
لانك اتكلمت عن احساسي لما بسافر وبرجع بلدي واحس ان فيها شيء متغير
من الحكومة او الناس
بجد راااائعه

just waiting said...

تعرف مصر ما اتغيرتش
الشعب والناس اللي اتغيرت
النفوس مبقتش النفوس
الدنيا ولقمت العيش والهموم اللي بيشلها اهلها خلوهم ينسو انهم اهل مصر

miroooo said...

الصراحه يا احمد عندك حق بس ياريت نبص لنص الكبايه المليان لسه فى ناس كويسين وطيبين
لازم يكون عندنا امل ونغير من نفسنا علشان مصر تتغير وتبقى كويسه لازم نتقرب من ربنا ونفوق لنفسنا شويه
ان شاء الله هنكون افضل
خلى عندك امل وعندنا كلنا
احنا بنحبها والله بس عايزين وقفه مع نفسنا
ممكن تختلف معايا فى الراى بس الاختلاف فى الراى لايفسد للود قضيه
تحياتى

صوت من مصر said...

اه لو شادية شافت الكلام ده كانت غنته

حنين said...

حلوه اوى يا رومانسى
احساسك فيها صادق
الكلمات بجد عبرت عن حالنا كلنا
واحنا عايشين فى بلدنا
تحياتى وتقديرى

SHAPE YOUR LIFE (ABOALI) said...

ياااااااااااااه
لو مصر يا رومانسى نطقت هتقول كتييييير
هترد عليك وعلى تساؤلاتك وهنطلع احنا المذنبين ..كل واحد فينا وفى المجتمع مقصر فى حق نفسه وفى حق غيره ونرجع نلوم الزمن ونلوم مصر ...مع ان احنا اللى بنغير الاحداث واحنا اللى بادينا نتقدم او نتدهور اكتر ...ولو كان مفيش امل فى الاصلاح لسقط عنا التكليف بمعنى اننا مش هنبقى مسئولين امام الله عن حال البلد ..لكن من المؤكد ان فيه امل لا ياتى الا بالاراده وعودتنا الى الطريق الصحيح .

تحياتى ليك يا رومانسى بس مقولتلناش ناوى تسافر على فين وسايبنا؟

sony2000 said...

بجد عندك حق فكل كلمه بتقولها
وخدنا معاك ياعم لحد ماتتعدل وربنا يهدي الامور:)

حلمى البعيد said...

رومنسي
أنا أسفه على التأخير
والله ببقي نفسي أكون الأولى
بس النت ربنا يخليهولنا ويخليللنا مصر
مصر هتفضل أم البلاد وأحلاهم
بس الناس عاوزين الناس تسافر هى علشان مصر تبقي حلوه
فين أيام ما مصر كانت جوليت
بس إن شاء الله في أمل إنها تبقي أحلى وأحلى
تحياتى ليك رومنسي
ربنا يغير الأحوال للأفضل

زهور الامل said...

متغيرة من الاوضاع اللي بقت مترضيش حد يا احمد
كل حاجة بقت في الضياع والانحدار

ربنا يستر

تحياتي

romansy said...

مجرد فتاة
اول تعليق منور بيكى

romansy said...

مجرد فتاة
تعرفى بقى هما اهلها طيبين قوى لدرجه انهم مضحوك عليهم من طوب الارض
كل واحد فينا بيحاول يعمل شئ ينفع بس بتلاقى الف واحد بيخرب الدنيا

هو دا حالنا

romansy said...

ستيتة حسب الله الحمش
ايزيك يا دكتوره
اه والله يا دكتوره احنا فقدنا المعرفه وافتقدنا احنا ايه وليه وامتى
دلوقتى انتى متشفويش الزعيم من دول غير لما يطلع يقول كلمه وبس وتكون لمصلحته وبس
ربنا يخلينا اليوتيوب
والحمد لله انه مش مصرى

romansy said...

منــار فايد
اهلا يا دكتور
اهو من اللى احنا شايفينه
حبيت اغير

romansy said...

ندا منير
اهلا بالصحافه بحالها احنا بنحب البلد دى ومستغربين قوى لانهيار اللى بيحصل فيها نفسنا تبقى احلى بلد فى الدنيا بناسها وبشعبها

romansy said...

Tshandny
الله عليكى
طب نعمل ايه ووصلنا ازاى كده بقى دى مصر اللى كل الانبياء والصالحين سابوا كل الدنيا وجاهوها احنا اتغيرنا لاننا فقدنا احساسنا بالمصريه والدم والعروبه

romansy said...

هبة الحياة
بما انك بتسافرى بره انتى شايفه ان المصريين بس اللى اتغيروا ولا العالم اتغير برضه

romansy said...

Just waiting
والناس اللى مش ناسيه قليلين
وبيتعبوا قوى قوى
بس كل اللى فى ايدينا نعمله اننا نحاول نبنى كيان لوطننا ولينا

romansy said...

miroooo
انا طول عمرى عندى امل والله بحلم ان بكره يبقى كويس عن النهارده بس لما بلدنا يحصلها كده و واحنا فى ايينا امكانيات كتير نعمل ايه
هنقول الشعب كتير هنقول وهنقول بس كل اللى نتمناه اننا نلاقى ناس بتخاف على الناس والحب منتشر نقف مع بعض فى الشده والرخاء

romansy said...

صوت من مصر
يا عم كيمووو
بقى شاديه اللى قالت يا حبيبتى يا مصر هترضى تقول الكلام اليائس من وطن معدوم فيه الامل

romansy said...

حنين
كلنا حاسين اننا جوانا كتير واحنا بنقول كده علشان حالها ينصلح
نتمنى يارب

romansy said...

SHAPE YOUR LIFE (ABOALI)
اهلا بيك يا استاذى
معاك يا ابو على اننا احنا اللى بنغير الاحداث بس تقدر تقول ان الانسان اللى عنده عزيمه هو اللى يقدر يعمل كده بس زمان كانوا قله بس كانت الزعماء قد ايه وعلى قدر كبير من الثقافه والوطنيه
تعرف يا ابو على لو عرفت اسافر كنت سافرت من زمان انما اعمل ايه بحبها

romansy said...

sony2000
طب بس احنا بنقول كده من غلبنا انما هو احنا نقدر نبعد ثانيه عنها

romansy said...

حلمى البعيد
منه لله النت اللى فى كل مكان اوعى يكون بيصداره زى الكهربا وزى الغاز كده اهو دا اللى ناقص

romansy said...

زهور الامل
ايزيك يا امل طب والناس الطيبه والناس اللى بتحب فعلا بعضها لله
يعملوا ايه
دول اللى البلد عايشه بيهم وليهم وعشانهم

نعمل ايه بقى ف مصيرنا

Unknown said...

أنتى مصري وفتخر..
وترك التاريخ يتكلم يبن مصر..
وعمرك ما تخلي راسك ينكسر..
تحياتي
إبتسامة عيون أهدهالك
تقبل مروري

ريمان said...

كلمات واقعيه اوى اوى


وبتعبر عن حالنا اوى


تسلم اديك يا رومنسى

الازهرى said...

ليـــه وشوش الناس متـغيره


لما الإنسان يحس بالغربة وهو وسط أهله وناسه وهو جوه بلده

يبقى لازم وشهيتغير


سلام يا صاحبى

romansy said...

إبتسامة عيون

اهلا بيكى كلنا بنفتخر بمصريتنا بس احنا نفسنا مصر تبقى احلى بلد فى الدنيا

romansy said...

ريمان
اهلا ريمان
بس نتمنى من ربنا انه يقدرنا اننا نخللى بلدنا احسن بلد فى الدنيا

تحياتى

romansy said...

الازهرى
اهلا بيك يا صاحبى
معلش بقى اصعب شئ الغربه واحنا فى وسط الناس اللى بنحبهم
نتمنى ان حالنا ينصلح يا صاحبى
اللهم ااامين