كام مره تحب ؟

كام مره حسيت انك بتحب؟
مره واحده فى حياتك ؟
ولا مرات فى مره واحده ؟
حبيبت كام مره ؟
ممكن تحب اتنين او تلاته فى وقت واحد ؟
وهل دا يبقى حب ولا اعجاب ولا احتياج للحب ؟
انا من وجهه نظرى ان الحب الحقيقى هو اللى بيكون
عايش طول العمر جواك ومبتقدرش تنساه ابدا ابدا ممكن
يكون الحب الحقيقى هو الحب الاول لانه بيعيش الى مالا
نهايه حتى لو حبيبت بعد كده او اتجوزت بيعيش جواك
حتى ولو بنسبه بسيطه قوى لانه زى الزرعه اللى
بتكون جذوزها متشعبه فى باطن الارض وحتى لو خلعتها
بيفضل بقايا جذور حتى لو ماتت الجذور دى بتفضل برضه
فى الارض الحب الحقيقى هو الاحساس كانك طاير لما تشوف
انسانه تملى عليك حياتك تيجى فى احلامك لما تشفها بتجرى كل
ساعات الدنيا الوقت معاها بيعدى بسرعه جدا هى الانسانه اللى
تفهمك من غير ما تتكلم تفهمك من نظره عين من لمسه تحس
بوجعك قبل ما تقول الاه هى الانسانه انك بتحس قدامها انها
كل حياتك بتحس بحنيتها وتحس بصداقتها وتحس برعايتها ليك
فيه اغنيه لمحمد فوزى" فاطمه وماريكا وراشيل دول جوه قلبى كوكتيل
تعجبنى فى واحده خفتها والتانيه حلاوه لفتتها والتالته دلالها وقساوتها
"والرابعه ادوب ادوب ادوب من بسمتها
وفيه كمان استعراض لفؤاد المهندس وشويكار بيقول قلبى يا غاوى خمس قارات
اعقل اعقل اعقل وارسيلك على قاره
اما بقى المطربه شاديه قالت رايها فى اغنيه ان راح منك يا عين هيروح من قلبى فين
دا القلب يحب مره ميحبش مرتين
وقال عن الحب ابو تمام نقل فؤادك حيث شئت من الهوى ما الحب إلا للحبيب الأول
كم منزل في الأرض يألفه الفتى وحنينه أبدا لأ ول منزل
وقال العلوي الاصبهاني في خلاف ذلك
دع حب أول من كلفت بحبه ما الحب إلا للحبيب الآخر
ما قد تولى لا ارتجاع لطيبه هل غائب اللذات مثل الحاضر
وقال اخر فى خلاف الاتنين
قلبي رهين بالهوى المقتبل فالويل لي في الحب إن لم أعدل
أنا مبتلى ببليتين من الهوى شوق إلى الثاني وذكر الأول
وفى النهايه اقدر اقول ان القلب ممكن يعشق مره ومرات
بس الحب الحقيقى والعشق مبيجيش غير مره واحده بس