Friday, March 13, 2009

نــــقـــــد



يارومانسى فوق من الخيال
كفياك رمانسيه بقى
تعبتنا ووعدتينا وعشمتنا بيوم اللقا
كفياك تكون انسان غريب
عايش فى دنيا من الخيال
كفياك بتتمنى حبيب
وبتبنى قصر من الرمال
فوق يا رومانسى من الخيال
فوق يا رومانسى من الخيال
عيش شويه فى الحقيقه
هتلاقى حب يكون محال
وحب عاش بميت طريقه
والدنيا ماشيه على اى حال
يارومانسى فوق حرام عليك
ضيعت عمرك راح هدر
ف وهم صنعته انت بيديك
عايش ملاك بين البشر

132 comments:

mohamed ghalia said...

الله عليك يارومانسى
دايما كلماتك روعة
دمت بكل الود

سفروتة said...

دائما من ينتقدون يفقدون ما لديك
يصعب عليهم امتلاكه
فيعوضوا ذلك النقص بكثرة الكلام

ولكن ما دمت مقتنعا بما تفعله وما تملكه
لا تنصت اليهم

كلماتك معبرةاوي يا رومنسي
دمت بكل ود
:)

marmar said...

يا رومانسي حرام عليك بلوجك دايما بيهنج
طلع عين اهلي بيعلق ومش بيفتح الكومنت وييييييي كوسه بقى
انا مفروض اكون اول تعليق عشان شفت عل ريدر عندي اتنين دقيقه يعني انا الاول بقى
نرجع بقى للبوست
انا بنصحك وبشده انك تعيش كل احلامك في الخيال وتمتع بجمالها بس حققها في الحقيقه طبعا
ربنا يكرمك يارب

تحياتي

صوت من مصر said...

ياعم انا كان نفسي ابقي اول تعليق لكن
عموما كلمتك روعه بس الدنيا مش ابيض واسود

saragebaly said...

ومالنا لا نعيش الخيال !!؟
لـمَ لم نتخلى لحظة عن قسوة الواقع ونهرب الى روعة الاحلام ..!!؟؟
هناك
من ينعت احلامنا
وهناك
من يدعونا بشفقة الى ان نفيق
فلا تذهب الا هناك ولا هناك
فقط
اهرب وحدك
الى احلامك
رسمك وخيالك
ولا تنظر اليهم
او تنصت الى همهمات ثرثراتهم

=====

تحياتي وتقديري لك يا أحمد
دمت بخير دائما

لحظة تأمل said...

انت تكون رومنسى اى ان تكون انت
فيكفيك انك تعيش فى عالمك لتتنفس هواءك الخاص

ان تكون مختلفا لا يعنى ان تكون مخطئا

تحياتى دوما

مى .. لحظة تأمل

دعاء مواجهات said...

وحب عاش بميت طريقه

مش عارفة الجملة دى فيها اية
شدنى معاها وخلانى افكر فيها اوى

بس سيبك
مفيش ملايكة ع الارض

خدها منى كلمة

بيس

mahasen saber said...

يا رومانسى خليك رومانسى واوعا تتغير وتبقى غير رومانسى

انسانيتك فى رقة وطيبة ودفء مشاعرك واليى بيخلقوا منك رزمانسى

ومتخليش اى شوية عاصفه رمليه تغيرك

mahasen saber said...

اثبت كما انت انا بقلك يا دسوقى اهه

خليك رزمانسى كما انت

Tshandny said...

كلامك حسيته قوي
بس مش كل حلم بنحلمه بيكون حقيقة نقدر نصنعها
بس على الاقل مش تحرم نفسك من الحلم
احلم
يمكن في يوم تصحى من حلمك تلاقي نفسك محققه
عيش زي العندليب
اللي اتكلم عنه جاهين
يا عندليب ماتخافش من غنوتك
قول شكوتك و احكي عن بلوتك
الغنوة مش هتموتك إنما
كتم الغنا هو اللي هيموتك
!عجبي

wafaa said...

ده مش وهم
ده حلم
لو بطلنا نحلم نموت
احلم على كيفك واتمنى تلمس احلامك

انا حره said...

لا يارومانسى متسمعش كلام محاسن

خليك رومنسى مع اللى يستاهل بس وكمان فالوقت المناسب للرومانسيه مش طول الوقت ومع اى حد

Meme said...

لالالالالالالالالالالا يفوق ايه احنا ماصدقنا لاقينا واحد رومنسي في الزمن ده
ههههههههههههه
تسلم ايدك يا احمد

عاشقه وغلبانه said...

علي راي الست شرين
ومن الغباء انك تعيش زي الملاك بين البشر
الكلام اللي انت كاتبه ده هاخده لنفسي
ههههههههههههههه

may said...

يا رومنسى

بصراحة مش عارفه اقول ايه

هى كلمة وحدة

روعة

مى

زوجة عنيدة said...

يا رومانسى اوعى تفوق من الخيال
يا بنى العباقرة هما اللى خيالهم واسع

اوعى تفوق حلوة الرومانسية دى غيرك مش طيلة

تحياتى

وردة said...

لا يارومانسي
اوعي تفوق
تفوق ليه
هي الرومانسية عيب
ولا حاجة نتمني تروح مننا
الرومانسية شرف
وميزة يتميز بيها
زوي القلوب العامرة
كلماتك جميلة
ولكن ارجو الا تنفذها
سلام

جارة القمر said...

رومانسي
احنا اتعودنا علي رومانسيتك الجميلة واحساسك العالي
اوعي تتخلي عن رومانسيتك دي
وكمان انا مع سفروتة في كلامها
لانهم مش عارفين يبقوا زيك بينتقضوك
خليك معانا رومانسي للابد
تحياتي لك

مشمشه said...

وصلت انت لحاله انا بقيت فيها دلوقتى كل مره كنت بقول لازم اتغير وافضل بنفس رومانسيتى بس ارض الواقع هو الى فوقنى ومش كل الناس كويسين مش حقولك زى كل الناس مش تفوق من رومانسيتك حقولك فوق مع البشر خليك عايش على ارض الواقع وخلى الرومانسيه دى للى يستحقها لو كان فى حد يستحقها

فتاه حالمه said...

هووووووووووووي
جايه بهرج انا صح مقصرة في حقك جدااااااااااااااااااااااااااااا
عارفه معلش سامحني بس والله باجي اقري
بس تقريبا جيلي حاجه زي خرس تدويني شوفت اهه الكلام الغريب الي بقوله ده
بس اعلق بقي
احسن شئ في الدنيا انك تعيش برومنسيه ونظرة حالمه اينعم ساعات بنتصدم بالواقع المرير
بس قلوبنا بتبقي نقيه زي الاسفنجه تمتص الصدامات بتقدري نعدي
سيبك من اي حاجه مدام مقتنع بنفسك يبقي انسي اي حاجه
سلام ومش تزعل مني لتقصيري

حاسوباتيه said...

نقد حلو للنفس والله

احساس طفلة محبة للرومانسية بس واقعية said...

لا يا رومانسي الواقع حلو برضو
لسة البوست اللى فات قلت على يوم قضيتة مع صديقك دا كان واقع وكان سعيد

دا مش معناه انك تفوق من الخيال والاحلام والرومانسية
محدش يقدر يبعد عن رومانسيتة مادام هى طباعة

عبرت عن نقدهم بطريقة جميلة
واتمنى انه يكون نقدهم مش نقدك انت

تقبل مرورى

سميرة said...

طب ايه التغيير المفاجئ دا بقى
هو انا فاتني حاجة ولا ايه
انا صحيح بقى لي فترة بعيدة حبتين
بس انا اعرفك رومانسي ومتفائل
ايه اللي حصل؟
عموما لابأس من بعض التغيير
بس لازم ترجع تاني
دا انت بتنقذنا من قسوة ومرارة الواقع

تحياتي

gogo!sf said...

مافيش احلى من الوهم والخيال
على الاقل مش هتلاقى اللى يخنقك
بس السيءاللى فى الوهم ان الواحد يضيع عمرة هدر دى هى الحقيقة المؤلمة
تحياتى

ساره said...

رومانسي الرائع

شوف ياعزيزي
ساعات الواحد يمل من نمط حياته
يمل من طيبته
يمل من رومانسيته
والله حتي ساعات ممكن تمل من اخلاقك

هي مراحل نمر فيها تمل شويه ونطلب اللي مش فينا
بس بعدين القالب غالب
والطبع غلاب
نرجع لطبعتنا
يعني يا رومانسي
عادي اللي انت تمر فيه
شويه وترجع لنفسك
ولرومانسيتك
وطيبة قلبك

ونقد النفس ظاهره صحية
لانه بعض النقد مفيد لصحة
:)

مـجـنـووون said...

عمر إلي كان بيحب بأخلاص ورمانسي عايش في الأوهام

ودا طبعا ميمنعش أن الواحد يقف مع نفسه شويه ويشوف هو عايز أيه ويشوف الصح ويعمله

بس علي فكره عمر الملاك بيزعله أفعال البشر

تقبلي مروري
مجنووون

maioya said...

عجبني اوي الكلمات دي
الدنيا فيها الابيض والاسود والرمادي
وياريت علي طول نفضل في الابيض
حتي لو في حلم او كلام في قصايد

ماء تشرين said...

حلو نعيش حبه كده مع نفسنا لا ش وحش انك تكون رومانسي
بس احنا حياتنا كلها بقت واقع صعب فمفيش مانع نهرب شويه ونأخد أحلمنا وضحكه بريئه واحساس جميل شويه معانا ولووحدنا يمكن ده يخفف عننا حجات ياما

تحياتى لرومنسيتك البتنسينا حجات كتير

ماء تشرين

ريمان said...

عارف يا رومانسى

كنت حاسه انك فى يوم هتقول كده

هى الرومانسيه مش وحشه هى بالعكس جميله جدا بس لو كانت رومانسيه واقعيه


تحيياتى لك

كلماتك كالعاده معبره وجميله

norahaty said...

شوية كدة شوية كدة!
يعنى لا رومانسية على طول
ولا واقعية على طول
بس مين اللى يضبطها بقى؟
قولى انت بقى؟

norahaty said...

ايه ده؟
ايه ده؟
ايه ده؟
هو انا نسيت
اقولك ان القصيدة
حلوةاوى اوى
طيب معلش :(
القصيدة حلوووووة
اوووووووووووووووووى

نفرتارى said...

النقد شئ جميل خصوصاً لما الواحد ينقد نفسه .. بس النقد لما يكون فى شئ خطأ يجب ان ننقده .. ولكن فما هو الشئ الخطأ فى الرومانسية .
فالرومانسية ليس خيال لكى تفوق منه بس واقع يجب العيش بيه وفيه
لقد اعتادنا ايها الرومانسى على رومانسية حالمة واقعية فأين هى ؟؟؟

دمت بكل خير وتقدير ،،


نفرتارى

*البت المشمشية *حلوة بس شقية * said...

حلو الكلام بس ده مش خيال عشاان الحب موجود بينا
واكيد هتلاقى الحب
مش مجرد خيال ولا كلام

وومن said...

ايه ده ده نقد للنفس ولا بتديها قلمين

هو ليه لما بنقف قدام نفسنا بنبقي محضرين ليها كل ادوات التعذيب الممكنة واللي مش كمان

رومانسي هي دي تهمة يعني لا مش تهمة ولا عيب

المهم انك فعلا متقفلش علي نفسك قصور الخيال وتعيش اسير ليها

عيش رومانسي بعقل لآن مش كتير رومانسيين
خليك رومانسي لأن خيالك حديقة غناء من المشاعر متنفس للكثيرين

لكن كون واقعي وقت ان تحتاج للواقعية

النقد خطوة كويسة وموازنة الأمور الخطوة القادمة إن شاء الله
تحياتي للرومانسي

Rannon said...

حلوة
الحياة محتاجة واقعية مع شوية رومانسية
تحياتي :)

الفراشة الصغيرة said...

ينفع تكتب كلام رومانسى تحس بيه قوى
لكن مينفعش تعيش فى رومانسيه على طول
فى مجتمع ميعرفش يعنى ايه رومانسيه

مينفعيش تعيش برومانسيه
فى المطحنه اللى احنا فيها دى

صدى الصمت said...

لولا وجود الرومانسية فى الحياة لفقدنا إحساسنا بروعة وجمال الأشياء وأصبحت الدنيا بلا طعم ولا لون ولا رائحة
الرومانسية تغذى الروح والعقل وترقى بالنفس
تحياتى
دمت رومانسياً إلى الأبد

عاشقة الورد

شمس النهار said...

علي رأي شيرين
ومن الغباء انك تعيش زي الملاك بين البشر
بس انت عايز تفوق ليه
هو في حد طايل يكون كده
مش احسن ماتعيش بلا مشاعر اصلا

EMMY BABY said...

ياريت الناس كلها تبقى ملايكة مكنش حد تعب

”*°•.˜”*°•..سونه..•°*”˜.•°*”˜ said...

يااااااااا اخيرا
السلام عليكم الاول
عزاب على ما عرفت ادخل ياعم غير الباب ده بيعلق معى ههههههه
المهم انى دخلت خلاص وشفت الكلام الجامد ده بس ده مش نقد وبس ده بقد بناء اكيد هيخليك افضل مع انك انسان جميل ماشاء الله بشهاده الجميع
ولا تندم على انك ملاك فى وسط البشر لا
اكيد انشاء الله فى يوم من الايام تجد الملاك الذى يجعلك تعيش فى الجنه تقبل مرورى تحياتى
((***ســونه***)) .

سلوى said...

وليه تتغير

خليك بس وسط
فلا لين فتعصر
ولا صلب فيكسر

ربنا يحفظك

شخـا بيــط مـحـجـوب said...

لالالالالالالا يارومانسى

اكيد هزار

تحياتى ليك

شخابيط mahgoub

اعترافات قلب said...

وااااااااااااااااااو
حتى وأنت زعلان كلامك جميل

بص يا رومنسى لازم نحلم بالحاجة علشان نعرف نحققها ، ولو مش عارف تحلم يبقى مش هيكون عندك هدف.
وإحنا كده لو بطلنا نحلم نموت.
بس الغلط إن إحنا نعيش فى الخيال ومانتحركش للأمام علاشن نحقق الحلم ده.
تحياتى
شيمو القمر

maha zein said...

امممممممممممممممممم
مالك بقه
جد ده ولا كده وكده

طيب عموما يا عم رومانسي
هستغل فرصة انك مثلا تكون متضايق
وهدلك علي شريط والله لو سمعته قبلك هيرتاح قلبك وهترضا بحالك اوي
خد يا سيدي
http://www.way2allah.com/modules.php?name=Khotab&op=Detailes&khid=684#UP
هتلاقي والله اصلا الدنيا دي لا ليها لزمة ولا بتاع
وكل حاجة متقدرة عند ربنا
روق يا عم انت ومتخنقنيش
ايه يا ختي ده

عالم ماريونت said...

عزيزي رومانسي
الخيال قد ما بيكون لذيذ بس لازم تطلع منه وتعيش على الارض

تحياتي ليك
رنا

GiGi said...

كلام صح
الرومانسيه دى بقت خيال مش حقيقه
يارب يرحمنا من الدنيا دي اصل بجد تعبنا

Sweet Violet said...

ممكن تعدل مابين الخيال و الواقع

ده هيكون افضل

لان الدنيا بدون خيال صعبه جدااااا

و الخيال الدائم بدون وجود الواقعيه فى الحياه يبقى عذاااااااااااب

الملاك said...

السلام عليكم ورحمة الله وبركاته
اخى فى الله رومانسى
لقد عرفناك بطيبة قلبك وحبك الدائم لمن حولك دون انتظار اى مقابل عرفناك برومنسيتك الحالمة الرائعه النادرة هذه الايام فاصبحنا نذهب اليها وان لم تشعر انت بوجودنا
فكم من مرة ادخل الى مدونتك لا لاقراء كلماتك بل لاحاول ان اتعايش معها
بس بصراحه كل مرة اخجل من ان اضع تعليقا لانى اجدنى وقد تاخرت كثيرا جدا فاتراجع واقول انتظر البوست الجديد فيتكرر ما حدث سابقا بس المرة دى متهيالى متاخرتش كتير

تعرف اخى بجد والله انا ببقى سعيده جدا لمجرد رؤيتى لاسمك فى اى مدونة وبحس بتفاؤل ولا تسألنى عن سبب ذلك لانى حقا لا ادرى

اخى اريد ان اقدم لك شكر خاص لما فعلته معى ولكنى اجد كل كلمات الشكر عاجز عن التعبير عن ما اريد قوله لك فجزاك الله خير الجزاء عنى وبارك لى فى اخوتك وتواصلك

اخى كن رومانسى كما عرفناك دائما بقلبك المحب لكل من حولك دون انتظار مقابل ولا تحاول ان تتغير الا لتكون افضل
اخى تقبل اجمل تحياتى واعذبها
دمت برعاية الله

ঔღঔ نـــوارة ঔღঔ said...

الرومنسية جميلة اوووي

وبتاخدنا لعالم تاني كله حب

كون رومنسي وعيش بالخيال لكن خد بالك من الواقع بلاش يصدمك بمرة وتكون الصدمة قاسية

اسلوبك رائع جدا

ومدونتك مميزة

بالتوفيق يارب

Muslima said...

اولا وقبل اى شى سورى على تأخيرى

وثانيا من الواضح كدة انك دخلت الفيلم بتاع ميكانو لازم تقولى رأيك فيه بصراحة ... انا سمعت عليه كتير كتير زعلنى

ثالثا
عوزة اقولك ليه النقد دا كلو
الرومانسية موجودة وهتفضل موجودة والحب اجمل شى فى الوجود
بس كل شى بوقته .. دى ترتيبات قدر

وبالنسبة لجملة
ف وهم صنعته انت بيديك
عايش ملاك بين البشر

بكرة هتلاقى الملاك اللى زيك وهتلاقى كان برضو بيدور عليك

كلمات جميلة حقا
ولكن لا تستسلم للنقد ... فالرومانسية حقيقة وليست وهم

فراشة said...

رومنسى
نفس اللى بيتقالك لو تفتكر اتقلى قبل كده واتكلمت عنه فى مدونه الاحلام الورديه وكان ردك عليا بيثبتى انى استمر على رومانسيتى وماتخلاش عنها
يعنى عايزة اقولك انك اكتر واحد تعرف ترد على هؤلاء المحبطين الفاقدين للرومانسية واقدر اقول عليهم الحاقدين على اصحاب القلوب الرقيقة لانهم اصبحوا نادرين
خليك زى ماانت الرومانسية دى عملة نادرة كنز فى حد عنده كنز ويسيبه
وكنوز القلوب اغلى بكتير من كنوز الاموال والجواهر
رومنسى الرومانسية انا منتظره ردك انت عليهم باجمل مدونه
تحياتى

smilyrose said...

ايه يابنى اغيب شوية

ارجع الاقيك بالشكل دا

مالها الرومانسية ومالها الاحلام

اه ممكن الواحد يعيش حياته يحلم

وممكن يحقق الحلم وممكن لا

بس الحياة من غير حلم ومن غير

الرومانسية متبقاش حياة يا رومانسى

لسه الامل موجود ولسه حلم الحبيب موجود

دور عليه بقلب صافى وانت مسيرك هتلاقيه

اختك

وردشان

روح الحب الصادق

smilyrose

زى الهوا said...

حتى الحلم بخلان على نفسك بيه ؟؟؟

Desert cat said...

احيانا الخيال بيكون عوض عن بعد الحبيب حتى يعود
بس بلاش الواحد يسرح مع الخيال اوى احسن يتجنن
:)))
تحياتى ليك

Gigi said...

السلام عليكم
رومانسي رد بالك يسيطر عليك الشعور هذا فكنا احنا مستانسين جدا بيك
اوعي تغيب ولا تتغير خليك كيف ماعرفتك
دمت رومانسي وبخير
أستودعك الله

dramaqueen said...

دايما رائع و صعب اوصف جمال كلماتك وتمكنك من وصف احساسك

ودايما ردى عليك متأخر
معلش

kemet said...

السلام عليكم ورحمة الله وبركاته

احمد
طالما انك قادر على الحب وانت انسان
فهناك من هم مثلك ايضا قادرين على الحب مثلك تماما
ولكن لكلٍ طريقته في الحب

تحياتي
الى اللقاء

romansy said...

mohamed ghalia
اهلا بمحمد باشا
عوضت كده بقى البوست اللى فات وجاى بدرى خالص

تحياتى

romansy said...

سفروتة
اخبارك ايه يا سفروته
واخبار السفاريت ايه
تفتكرى كده يا سفروته هما فعلا مفتدقين الحب والرومانسيه
انا على فكره مش زعلان
دا كويس ان الاقى حد ينتقد ويقول رايه
تحياتى يا سفروته

romansy said...

marmar
اسف يا مرمر
دا اكيد البلوج بيعاندك بس
بس اكيد مش هيستحمل حلاوه تعليقك
انا هحاول اعيش الحقيقه بس برضه هعيش الخيال لا نه اقرب حاجه ليه

تحياتى

romansy said...

صوت من مصر
اهلا يا محمد
يا سيدى تتعوض بقى المره اللى جايه
ربنا يخليك يا محمد
انا شكلى كده هحول سياسه
هههههههههههههه

romansy said...

saragebaly
اهلا يا ساره
ما اجمل الخيال عندما نلاقى الحبيب
ما اجمله عندما يكون لنا جمال
عندما نعشق بصدق
ونحب نحناج للخيال كى يدخلنا فى عالمه

عالم بلا نفاق

romansy said...

لحظة تأمل
اهلا يا مى
انا كل مره بقول امل
لانى شايف انك امل
فى الحياه ويارب تعيش حياتك جميله كده على طول
ان شاء الله هكون نفسى

romansy said...

دعاء مواجهات
اهلا بيكى يا دعاء
الحب بيعيش بميت طريقه بس لو مكتوبه يعيش

ومين اللى قالك بقى ان مفيش ملايكه
اكيد فيه
بس مش بيبانوا

تحياتى

romansy said...

mahasen saber

اهلا بيكى يا استاذه
تقريبا كده يا استاذه مبقاش حد عاجبه حال حد والناس بقت تدخل حتى فى شخصيه اللى قدامها اقولك حاجه انا بحب النقد واحب ان فيه حد ي قولى على عيوبى
مش بيقولوا رحم الله امرئ اهدى اليه عيوبى
بس الاهم اختيار الاسلوب

romansy said...

mahasen saber
حاضر يا استاذه
هخلينى زى ما انا ومش هتغير
تحياتى

romansy said...

Tshandny
اهلا بضوء القمر
والاحلام بالنسبه لى جزء من حياتى اقدر اوصل بيها لكل اللى مقدرتش احققه فى الحقيقهوانا عارف ان لما ابعدعن حياتى دى هتعب قوى
شكرا يا ضوء القمر على كلامك الجميل اللى بيدى روح جديده

romansy said...

wafaa
عزيزتى وفاء
اخبار البحر الاحمر ايه الاول
تصدقى انا محتاج فسحه هناك
ممكن الواحد يقدر يغرق همومه
تقريبا كده النيل مكفاش

تحياتى

romansy said...

انا حره
اهلا يا جميل
ازاى بقى انا نزلت النقد دا علشان اسمع للكل
واشوف الراى انهو اللى قريب من قلبى
برضه دا راى كويس بس تعرفى تقولى مين اللى يستاهل فى الدنيا دى
غير الللى بحبها بصدق

romansy said...

Meme
اهلين ميمى
شلونك
انتى شايفه كده عاوزانى اعيش فى الرومانسيه
الرومانسيه ممعناها الهدوء وصعب ان الانسان مننا يعيش فى عالم من هدوء
تحياتى

romansy said...

عاشقه وغلبانه
اهلا بالعاشقه والغلبانه
طيب يا عاشقه هانم نسمع كلام شرين وكمان خدى الكلام براحتك
دى مدونتك

تحياتى

romansy said...

may
اهلين مى

ربنا يخليكى يا مى واكون دايما عند حسن ظنكم

تحياتى

romansy said...

زوجة عنيدة
تصدقى فعلا انا كنت محتاج رايك واعرف الرومانسيه بيحصلها ايه بعد الجواز
هل يا ترى بتروح زى ما حاجات راحت وان راحت مين السبب فيها
الراجل ولا الست
وهل كل البنات بتحب الرومانسيه
مش عارف
ياريت تقولى

تحياتى

romansy said...

وردة
اهلا بيكى
والله احنا بقينا محتارين فى الزمن دا
صحيح الانسان مبيقدرش بسهوله يغير طباعه
بس فيه ناس تانيه بتسمى الرومانسيه ضعف
شكرا يا ورده على تعليقك
واتمنى اننا نحقق احلامنا دايما

romansy said...

جارة القمر
اهلا بيكى يا جاره القمر
اكيد برضه قمر زيه
خلاص يا قمر
انا هحاول اكون كده على طول
بس ادعيلى

romansy said...

مشمشه
اهلا بمشمشه
انا عارف ان ارض الواقع كلها مشاكل وكلها نفاق وخداع
بس الرومانسيه فى عالمى مطلوبه
علشان اقدر احس بالدنيا وطعمها
وحلوها ومرها

يارب دايما يبعدن عن النفاق

romansy said...

فتاه حالمه
اهلا يا جميل
ولا يهمك الله يكون فى عونك
الف الف سلامه على مامتك يارب تكون بخير دلوقت
والله يا جميل جميل كلامك
الرومانسيه مطلوبه فى العالم الغريب دا

e_emy said...

دى احلى حاجه الرومانسية

ولو فوقت هتنصدم وتكتئب

خلىك زى ماانت

واكيد كلمات جميلة كالعادة

ربنا يوفقك

رئـــــيسـة حزب الأحلام said...

ويفوق ليه
حد يكرة الرومانسيه هو اة الرومانسى بيتعب بس حتى لو عايش فى الوهم اكيد احثن من الواقع
تحياتى لك

MaNoOoSh said...

ايه دة يا رومانسى؟
انا شامة كدة ريحة يأس مفحفحة من الكلمات
لا بقولك ايه بقى.. أنا متشائمة سابقة وفاهمة الكلام دة كويس
لكن صدقنى بقى أنا مش هقولك لا خيال ولا روماانسية لكن هقولك أمل
خلى عندك أمل ان اكيد الانسانة اللى تستاهلك وتسعدك موجودة ويمكن مش عارفة تلاقيك أو مش شايفاك
أو يمكن انت مش شايفها أو بتدور فى المكان والشخصيات الغلط
اولا خللى عندك أمل انها موجودة وثانيا اسعى انك تلاقيها
وبإذن الله هتلاقيها وهتنور حياتك بالسعادة

ميرام said...

أرض الأحلام ..
على قد ماهي جميله
بيبقى لازم تغادرها في أسرع وقت ..
وبأقل خسائر ممكنه

(:
جميل اللي اتكتب يارومانسي
بانتظار جديدك
تحيـــــــاتي

doaa said...

ولما انت تفوق من الرومانسية هتسيبها لمين يا رومانسي ؟؟
متتغيرش ولا تغير طبيعتك بس متخدعش نفسك
ولا تخلي حد يستغل طيبة قلبك
ده أجمل حاجة فيك رومانسيتك

رندا said...

اجمل حاجة الخيال والرومانسية
بس برضة شوية على ارض الواقع ماشى
على فكرة انا باجى اخد حبة رومانسية من عندك وبعيش هنا اجمل كلمات الرومانسية العذبة الطاهرة عندك
اكتب رومانسى وعيش الرومانسية
دى اجمل حاجة فيك
ولو مجرد نقد ماشى
كلمات على ورق ابيض ماشى
لكن لن استغنا عن رومانسية حروفك مطلقا وابدا
تقديرى

romansy said...

حاسوباتيه
اهلا بعالم الكمبيوتر كله
النقد حلو بيعرفنا ايه اخطاءنا وايه اللى ممكن نقع فيه

تحياتى

romansy said...

احساس طفلة محبة للرومانسية بس واقعيه
اهلابيكى يا قمر
انا بحاول برضه انى ادى فرصه انى اكون فى ارض الواقع واخرج واتفسح مع صحابى واعيش حياتى
بس دايما انا بحب الخيال لانه بيحقق لى اللى مقدرتش احققه
على فكره بقى دا نقدهم
بس باسلوبى

تحياتى

romansy said...

سميرة
اهلا يا استاذه سميره
اخبار الدنيا ايه
واخبار الاطفال ايه
اكيد دول عباقره على فكره هنشوف فيهم ناس عظيمه كتير
ممكن نشوف تامر حسنى و حسام حسن
ورافت عبد الله
ومتسالنيش مين رافت عبد الله
علشان معرفوش
التغيير مطلوب فى كل شئ بس ناس زمايلى انتقدت اسلوبى
واتاثرت وكتبت الكلام دا

romansy said...

gogo!sf
اهلا يا جوجو
طيب وانتى شايفه ايه
مش هنقول وهم
احنا هنقول خيال الخيال بيدى لانسان احلام ممكن يحققها للواقع
لولا الاحلام والخيال ما كانت الوقائع

romansy said...

ساره
اهلا بالجميله
عندك حق اننا فى اوقات كتير مش بنحب نمط الحياه التقليدى وبنحب نعيش فى اجواء مختلفه
علشان كده اتمنى انى اقدر اعيش فى الواقع والخيال معا
تحياتى

romansy said...

مـجـنـووون
اهل يا صديقى نورتينى بزيارتك
والله يا صديقى انا احترت
احترت اكون ايه
منافق عايش على الارض ولا ملاك من السما
احساس صعب قوى لما مش تعرف انت عاوز ايه

romansy said...

maioya
اهلا يا مى
ايه اخبارك
مش بايدينا اننا نختار الابيض ولا نختار الاسود
بس اللى فى ايدينا الاحلام

romansy said...

ماء تشرين
منورانى يا قمر وبتعليقك الجميل
الدنيا والواقع الصعب دا
نعمل فيه ايه بنطر نهرب منه شويه فى الخيال ودى بتبقى احلى لحظات
شكرا على زيارتك واتمنى انك دايما تنورينى

romansy said...

ريمان
اهلا ريمان
اكيد لكل شئ نهايه والرومانسيه احساس صعب انه يتخلق بسهوله فى العالم دا علشان كده ممكن يموووت بسرعه بس الواقعيه احساس صعب بالمرار

romansy said...

norahaty
اهلا نورا
انا بينى وبينك مش عارف اظبطها ازاى
بس سيبها كده اللى مكتوب هنشوفه

romansy said...

norahaty

ههههههههههههههه
ضحكتينى والله
ربنا يخليكى يا نور
وتسلميلى
بزيارتك

romansy said...

نفرتارى
اهلا بيكى
والله مش عارف انا بقول ان الرومانسيه شئ جميل قوى اننا نعيش شويه فيها نحقق احلامنا فيها ونحاول نحققها على قد ما نقدر
والرومانسيهبقى احساس جميل بيخفف علينا صعوبه الواقع

تحياتى

شخـا بيــط مـحـجـوب said...

اشوف وشك على خير يا امير الرومانسية

انا بكتبلك وانا طالع على المطار
كل عام وانت طيب
تحياتى ليك بدوام التوفيق

شخابيط mahgoub

romansy said...

البت المشمشية *حلوة بس شقية *
صباح الخير يا بنوته
انا عارف ان الحب موجود بس بقى الناس مش شايفه اننا عايشين فى وهم وخيال وان الرومانسيبه دى مالهاش لازمه
وان فى الاخر الجواز الصالونات هو اللى ماشى

romansy said...

وومن
يانهار ابيض
انا عن نفسى انا شايف ان الرومانسيه مش عيب ولاخيال
بس اوقات كتير بينى وبينك بعيش فى الخيال كتير
اوقات كتير بحلم اكون انسان احلامه بين ايديه
وبحاول على قد ما اقدر انى احققها وربنا يوفقنا بقى
بشكرك على تعليقك واتمنى موازنه الامور فعلا

romansy said...

Rannon
اهلا بيكى يا قمر
نورتى من ارض العريش

طول ما احنا فى الحياه لازم نكون كل حاجه
بس لولا الخيال ما كانت الواقع

romansy said...

الفراشة الصغيرة
اهلا بالفراشه الصغيره
اللى كلامها كبير قوى
خلاص يا فراشه
خلصت الحكايه

romansy said...

صدى الصمت
اهلا بيكى يا عاشقه الورد
اتمنى دايما ان الرومانسيه تعيش جوان وتصحى الحب فى حياتنا
بس بقى مين اللى يقدرها ويحسسها ومش يفتكرها ضعف

romansy said...

شمس النهار
اهلا يا شموسه
انا تقريبا كده اتعاملت الفتره اللى فاتت على انى انسان ماليش اهداف ولا هوايات ولا اى حاجه احققها
وعايش كده وخلاص
بس الحمد لله
انا بقيت كويس

romansy said...

EMMY BABY
اهلا يا ايمى
اومال يا ايمى انتى بتعملى ايه على الارض
اكيد ملاك برضه
اصلهم يا ايمى معرفين وبيتعرفوا على طول

romansy said...

”*°•.˜”*°•..سونه..•°*”˜.•°*”˜
اهلا يا سونه
والله مش عارف اعمل ايه لو عندك حل قولى
ربنا يخليكى يا سونه
انا اتمنى دايما ان اكون عند حسن ظنكم
ببس ربنا يوفقنا ونحاول نبقى احسن بكتير

romansy said...

سلوى
اهلا يا سلوى
اخبارك ايه
يارب دايما اقدر اكون كويس واقدر اكون وسط واعيش الواقع واعيش الخيال
ومش نهرب منه كتير

romansy said...

شخـا بيــط مـحـجـوب
اخبارك ايه يا ابو حميد
يارب تكون كويس دايما

romansy said...

اعترافات قلب
اهلا بيكى يا شيمو
الاحلام جميله ولو حققنها بتبقى احلى بكتير
احساس جميل قوى اللى حلمنا بيه بيتحقق بين ايدينا

romansy said...

maha zein
اخبارك ايه يا مها
الحمد لله انا كويس دلوقتى
هو كان نقد على الماشى انى بحلم كتير قوى وطموحاتى اكبر من احلامى
بس شكرا يا مها على الشريط
وربنا يهديكى يا جميل

romansy said...

عالم ماريونت
اهلا رنا
الخيال جميل
بس ادينا عايشين هو على ارض الواقع
هنعمل ايه غير اننا نحققه

romansy said...

GiGi
اهلا جيجى
والله بينى وبينك احترت
ومش عارف اعمل ايه
الرومانسيه احلام
والاحلام ممكن نجعلها ملموسه
بس بنحاول

romansy said...

Sweet Violet
اهلا يا سويت ايه اخبارك
هحاول اكون انسان بيحب دا ودا مع انى اصلا بحب الواقعيه والخيال
واحب اعيش فيهم الاتنين

romansy said...

الملاك
وعليكم السلام ورحمه الله وبركاته
اخجلتينى بكلامك ايها الملاك البرئ
حضرتك تشرفينينى فى اى وقت يكفينى زيارتك بس وانك تقرى كلماتى البسيطه
وانا لو كنت عملت اى شئ فدا واجب عليالازم اقوم بيه
ايها الملاك البرئ
شرف كبير ليا انك تقوليلى الكلام دا انا انسان عادى خالص امنيته بس انه يعيش فى عالم خالى من الكدب والنفاق
بشكرك يا ملاك
على التعليق
وان شاء الله هكون احسن من الاول

romansy said...

ঔღঔ نـــوارة ঔღঔ
اهلا بيكى يا نواره
نورتينى فى مدونتى
الرومانسيه والاحلام مفيش اجمل منها بس نقدر باذن الله نحققها
شرفينى

romansy said...

Muslima
اهلا يا مسلمه
اولا مفيش تاخير ولا حاجه
تشرفى فى اى وقت
ثانيا
الفيلم فعلا كان جميل قوى وحسيت ان فى العالم اللى انا بحبه مش مهم تسمعى عنه ايه المهم اننااستمتعنا عنه
اديكى شايفه النقد والكلام اللى اتقالى
انا عارف ان الحب والرومانسيه موجودين فى الدنيا لولاهم اللى زينا مش هيقدورا يعيشوا فى العالم اللى مليان كدب ونفاق دا
صدقينى هنفضل نعيش بالرغم من اللى احنا شايفينه

romansy said...

فراشة
اخبارك ايه يا فراشه

انا فاكر فعلا انى قولتلك كده وكمان انا معاكى انا مش هتخلى عنى الرومانسيه هى تقريبا مفهوم غلط فى الزمن دا بس احنا بقى هنغير المفهوم دا ونكون رومانسين وواقعين على قد مانقدر

romansy said...

smilyrose
الحمد لله يا سمايلى انا بخير
بس الكلام دا انا عارفه وانتى عارفانى انى بحب اعيش فى رومانسيه وهدؤء
بس فيه ناسفاهمه الرومانسيه ضعف وانها شئ مش مهم

romansy said...

زى الهوا
اهلا يا زى الهوا
غصب عنى
لما الاقى الدنيا بقت اتغيرت والمصطلحات اتغيرت وبقوا يخلوا كل حاجه مختلفه
والقوانين اتغيرت مش عارف فين الصح وفين الغلط

romansy said...

Desert cat
اهلا يا قطه
ياريت نسرح
حتى الخيال والجنان بقوا مش طالينهم اليومين دول

romansy said...

Gigi
اهلا يا جيجى
منوره الدنيا
ربنا يخليكى يا جميل
ان شاء الله ربنا كريم
ومش هتغير غير لافضل ان شاء الله

تحياتى

حنان الشافعي said...

متأخره جدا
لكن التمسلي العذر
حاليا مش هقدر اقول الرومانسيه صح ولا غلط تكون ملاك ولا تعيش الواقع
لاني اصلا مبقتش بثق في الرومانسيه
اكتر حد بيجرح اكتر حد تحبه
مش عايزه كلامي يكون هدام او سلبي
بس هقولك املي في ايه
املي في يوم في حد يعوض كل شئ
تكون جروحي واحزاني الان
ثمن بخس لوجود اعظم وامل اوقع
هذا املي
هذا رجائي من الله عز وجل
ان كان سأحيا عمري اشكره علي نعمه
وان لم يكن
فلتكن جنته مطمعي الاهم والابقي
خالص ودي واعتذاري
واصدق امنياتي

romansy said...

dramaqueen
شكرا يا ملكه على كلامك الجميل دا
ومش متاخر ولا حاجه
انتى تشرفى فى اى وقت

romansy said...

kemet
اهلا بيكى
مش عارف هل فعلا لكل انسان طريقه
ولكل واحد بيدور
على اللى بيتمناه وفعلا هيلقيه
طيب ليه الناس دايما مش عاجبها حاجه

romansy said...

e_emy
اهلا يا ايمى
انتى شايفه كده
جايز يكون علشان انتى انسانه رقيقه بس
تحياتى

romansy said...

رئـــــيسـة حزب الأحلام
اهلا بيكى
نورتى مدونتى المتواضعه للغايه
الوهم صعب بس الخيال جميل
والواقعيه صعبه قوى بس لما تتحقق بتبقى اجمل بكتير

romansy said...

MaNoOoSh
اهلا يا منوشه
الحمد لله ان عدى الازمه على خير
يارب دايما تبقى سعيده ومبسوطه
متخفيش عليا الحمد لله
مفيش غير الامل هو اللى نعيش عليه

romansy said...

ميرام
اهلا بميرام
نغادر ارض الاحلام
طيب ونحقق احلامنا ازاى
لازم نعيش الحلم علشان نقدر محققه

romansy said...

doaa
اهلا يا دعاء
ربنا يخليكى يارب
ربنا يسترها علينا
الحياه بقت صعبه قوى
وان شاء الله نقدر عليها

romansy said...

رندا
اهلا بيكى يا استاذه
بجد بفح لما اشوف تعليقك عندى
ربنا يخليكى يارب
اومال بقى كلامك نقول عليه ايه
انا لسه بتعلم منك
ومنكم كلكم

ربنا يخليكى
ويسعدك دايما

romansy said...

شخـا بيــط مـحـجـوب
احمد
توصل بالسلامه يا حبيب قلبى
ربنا معاك
ومعانا يارب

romansy said...

حنان الشافعي
اخبارك ايه يا حنان
مش متاخره ولا حاجه
انتى كمان محتارهتقريبا كده الحيره بقت سلاحنا بس احب اقولك اننا لازمنعيش كل لحظه من حياتنا نعيش رومانسيبه وحب ونعيش الواقع مع اللى نتمناه
يارب دايما نلاقى اللى يقف جنبنا ويعوض كل شئ فى حياتنا
يبقى امنا واختنا وحبيبتنا
وكل شئ
يارب دايما يا حنان
نتمنى نعيش

Selfmeaning said...

اممممم
الخيال مطلوب برده عشان تعرف تعيش

romansy said...

Selfmeaning
انتى فينك بس
بقالك فتره من موجوده
الخيال مطلوب
بس زى ماانتى شايفه
كله ضرب ضرب
ههههههههههههههه