Friday, August 5, 2011

ذكريات رمضانيه



اهلا بيكوا اخواتى المدونين كل سنه وانتم طيبن ورمضان كريم
مين يصدق ان النهارده 5 رمضان الشهر كريم دا بيعدى بسرعه
جدا لدرجه ان انا عدى عليا 30 رمضان انا مش مصدق بس
الحمد لله يارب اكون بس اديت فيهم اللى اقدر عليه من
العبادات وربنا غفوررحيم هو المطلع علينا. قاعد بينى وبين
نفسى افكر اشوف صمت كام رمضان فى اللى عدوا
لقيت انى ابتديت صيام وانا عندى خمس سنين طبعا
كنت بصوم شويه كده لغايه الظهر بس كان والدى
الله يرحمه كان بيدينى 10 قروش كنت بجيب بيها
بسكوت وافطر بيه كنت بفرح قوى علشان بصوم
وبصلى الفجر مع ابويا وكنت بفرح قوى قوى
بالفوازير والف ليله وليله بعد العشا بقى كنت انا
واصحابى ناخد الفوانيس بتاعتنا اللى كان فيها شمع
ونحط الفوانيس فى النص ونلف حواليها ونقول وحودى يا وحوى
شويه شويه اتعلمنا ازاى نصوم اتعلمت اصوم لغايه العصر مره وبعدين لما كبرت شويه
صومت طول اليوم ابويا الله يرحمه جابلى هديه
عربيه بمفتاح كده كنت بلف المفتاح دا
العربيه كانت بتمشى بس على البلاط تيجى تمشى ع الارض تقف
ياااااه على الايام الجميله كبرنا شويه كده لما بقى عندنا 10 سنين
كنت بحب اروح العب كوره انا وصحابى بعد العصر نلعب لغايه
المغرب واول ما المدفع يضرب كلنا نسيب اللعب ونجرى نلحق الفطار
قمر الدين والتمر والبلح من اكتر الحاجات اللى بحبها قبل الفطار
والكنافه والبسبوسه من اكتر الحلويات اللى بحبها بعد التراويح
ايام جميله والله ربنا يعود علينا الف رمضان كلنا يارب

12 comments:

blue-wave said...

كل سنه وانت طيب
يا راجل يا طيب
وعقبال 100 رمضان جايين
بس مش بسرعه:))

Unknown said...

كل سنة وانت طيب وعقبال مليووووووووووووون رمضان كدة تصومه انت واحفادك

yasmina said...

هااااااى
ازيك ؟
يارب تكون دايما بخير

عايزة اقوللك فعلا بستنى كل بوست هنا

حلو اوى ان احنا نفتكر ذكريات زمان دى بجد فعلا احلى ايام
وخصوصا فى رمضان والعيد وكدة

لما كنا فعلا بنصوم لغاية الظهر وبتزيد كل شوية
ولبس العيد ولعبه وعدياته.......

احلى احلى ايام بجد

كل ما بفتكر الايام دى بدعى بجد ان تكون الايام اللى جاية احلى واحلى ان شاء الله

كل عام وانت بخير
ورمضان كريم
وان شاء الله الايام اللى جاية تكون احلى واحلى باذن الله

تحياتى

Tshandny said...

فكرتني يا احمد برمضان الجميل
بس انا بقى مش كان بيجيلي فانوس بشمعه لان ماما كانت بتخاف عليا من الفانوس ابو شمعه
انا فاكرة الفانوس قوي كان فانوس عليه مشغولات يدوية ملزوقة عليه و فيه ورد ماما هي اللي كانت بتعمله ليا و كان بيشتغل بالحجارة تقريبا انا جيل جديد شوية
و كل سنة كان بيجيلي فانوس ماما برضه اللي كانت بتعمل لي عليه ورد و حاجات بالخرز و كدة
بس افتكرت اخر رمضان بابا حضره معايا لما كان واخدني وبيقولي تعالي اجيب لك فانوس كبير على قدك كدة
و لاقيته بيشتري لي فانوس صغنن بيقولي انتي هتفضلي في عيني زي الفانوس الصغنن ده مش هتكبري ابدا و هجيب لاولادك فانوس كبير وانتي هجيب لك فانوس صغير برضه زي ده
للاسف السنة دي بابا مش جاب لي الفانوس الصغنن ولا حتى هينفع يجيب لابني الفانوس الكبير
ربنا يرحم والدك و والدي و كل المسلكين

Unknown said...

بس انا نفسى بجد فى فانوس السنة دى بالذات مش عارفة ليه.......؟؟

romansy said...

blue-wave

كل سنه وانت طيب يا دوكتور نورت المدونه وكل المدونات المجاوره


رمضان كريم

romansy said...

Diara El-Masry

اولا كل سنه وانتى طيبه
ويارب نحتفل نص مليون بس كفايه عليا كده والحمد لله

كل سنه وانتى طيبه

romansy said...

yasmina
اهلا يا سمينا اخبارك ايه واخبارك الدراسه
كل سنه وانتى طيبه
بشكرك جدا جدا جدا
على الكلام الحلو دا
هنعمل ايه بقى كل ما نعيش هنفتكر ذكريات رمضانيه جميله هو اكيد رمضان على ايامنا مختلف تماما عن ايامكوا بس هيفضل رمضان له ذكريات جميله

تحياتى

romansy said...

Tshandny
اهلا بيكى منوره المدونه
رمضان له ذكريات جميله قوى فى حياتنا وهنفضل طول العمر فكرينها ولا عمره هنقدر ننساها وننسى اللمه الحلوه
بس الفانوس ابو خرز دا جديد كان فانوس كده مخصوص علشانك
ربنا يخليك ماما يارب وتفضل تجيبلك الفانوس لاخر العمر ويرحم والدى والدك وامواتنا جميعا واموات المسلمين

اللهم ااااامين

romansy said...

Diara El-Masry

اهلا بيكى

الانسان هيفضل جواه طفل دايما انا بحب الفانوس بتاعى اللى اتربيت عليه ونفسى يكون معايا على طوووول

Tshandny said...

طبعا يا رومنسي الفانوس ده كان مخصوووووووووص زي ما كل حاجة كانت لية دايما مخصوصة بصراحة ماما دايما بتاعت الحاجات المخصوصة لية انا و بس :)
ربنا يبارك لك و يارب رمضان كتير يجي علينا و نعيش ذكريات حلوة معاه و نفتكر كل الحاجات الحلوة دي بس عمري ما هنسي برضه الفانوس اللي بالخرز على فكرة برغم تعبها السنة دي الا انها جابت لي فانوسين واحد لية بتاع كل سنة و التاني للضيف اللي في الطريق

romansy said...

Tshandny
طبعا طبعا هو الحاجات المخصوصه لو مش هتكون لتشاندى هتكون لمين يعنى ربنا يشقفى ماما يارب ويخليهالك والف والف مبرك للضيف اللى جاى فى الطريق اكيد هيكون ان شاء الله واخد صفات مامته وباباه وهو اللى هيجيبلك ان شاء الله الفانوس الصغير