Thursday, November 19, 2009

كان نفسى


كان نفسى النهارده
البســك تــوب الفرح
كان نفسى النهارده
احقق معاكى الحلم
كـــان نفســى اداوى
قلبــــى اللـــى انجرح
مــن اى شـــــــــــــئ
حاســين معاه بالظلم
بس القـدر قال كلمته
واحنا راضــــين بالقــدر
بكره ياخـــدنا لجـــــنته
لان فيـــــنا اللى صـــبر
فينا اللى راضى بالنصيب
و الصـــبر دا مـش غريب
بكره هتكــــمل فرحتك
والامل شــــــجره طرح
كان نفســـى النهارده
البســــك تــــوب الفرح
بتدمعى لا دموعك غاليه
عندى بلاش دمـــــوع
انتى الحياه والحزن راح
مفيـــــهوش رجـــــوع
يلا ابتــــدى مـــــــعايا
وعـــــــدى ازمـــــــتك
مــــــــــــانا قولتــــــلك
بكره هتكـــمل فرحــتك
دا كـــل يــــوم بتــــزيد
فى قلــــــبى محبـــتك
يــــــلا ابتــــــــــــــدى
وبــــــــــلاش خضـوع

70 comments:

آيوشة said...

كلامك جميل يااحمد بيخلى الدموع تجرى لواحدها
بس مش عارفة لغاية امتى كرامتنا هتكون متهانة بالشكل ده :(

norahaty said...

كرامتنا
وكرامتك وكرامة
البلاد الايام دى بما
تملكه من اسلحة ومن علماء
ومن قوة علمية وصوت فى مجلس الأمن
اسفة يارومنسى ولكنى اخالف
كل من يقول أن الكرامة
فى فوز فى مبارة لكرة القدم

عاشقة القمر said...

ربنا يعوضكم الخير انشاءالله

خواطر شابة said...

لمادا تعتبرينها نكسة انها مجرد مباراة كرة قدم تحتمل الربح والخسارة متى كانت قيمة الدول تحسب بانتصار في مباراة كرة قدم
انا أسف للاعلام المصري الدي شحن المصريين طيلة شهر وبتركيز اكتر مند السبت الماضي بأغاني وطنية وكأننا داخلون على حرب لدا من الطبيعي ان يكون للخسارة طعم النكسة لكنها ليست الحقيقة مصر خسرت مباراة وخسرتها بشرف فما المشكلة هده هي كرة القدم وهده هي قواعدها والروح الرياضية تقتضي تقبل الهزيمة مثلما نفرح بالنصر
تحياتي لك

خواطر شابة said...

اسفة يا أحمد كتبت بصيغة الانثى لم انتبه اسفة

rony said...

ايه يا رومانسى مالك
ده مجرد ماتش
واقولك هى بتدمع ليه؟
على الناس اللى اتصابت واتجرحت
وهما مش فى حرب ولا حاجه
لكنه مجرد ماتش
شفت احنا وصلنا لايه
تحياتى

حنان الشافعي said...

كلمات جميله قوي
اعمق كتير من مجرد حزن علي حاجه فاتت عشان فيها امل لحاجه جايه اهم كتيييييير

واحنا راضــــين بالقــدر
بكره ياخـــدنا لجـــــنته
لان فيـــــنا اللى صـــبر
فينا اللى راضى بالنصيب
عجبني الجزء ده جدا
فكرني بكلامي عن القضاء والقدر
ماهو ممهما صبرنا ورضينا بالقدر اكيد اكتر حاجه تصبرنا اننا نعرف ان الجنه مستنيانا نحقق اللي ضاع مننا فيها
ماتش بقي حب انتماء ايا كان

خالص ودي

زهور الامل said...

قدر الله وما شاء فعل

يمكن خير

كل اللي ربنا يجيبه كويس

وان شاء الله تتعوض
وان شاء الله هنفرح وهنلبس كلنا توب الفرح

ماء تشرين said...

جميله الكلمات دى اوى
بس اوعى تكون عشان المتش والله ازعل منك يااحمد والله كل كلمه قولتها اجمل من القبلها ولو في حبها تبقه احلى واحلى مصر مش متش يااحمد

لا تـــشـــتــــاق said...

الناس دى مش فاهمانا ياعم الحج
الموضوع مش موضوع ماتش
الموضوع موضوع عزه للاسف حكومتنا اهدرت حقوقنا
جميل ياحماده ربنا يقويك ويزيدك
الى الامام ياروميل

لاسع افندى said...

مصر اكبر من كده



تحيه لاسعه

saragebaly said...

ايوة يا أحمد

اكيد كان نفسك ونفس 80 مليون مصري
لكن
قدر الله وماشاء فعل
الحمدلله رب العالمين

مصر خسرت ماتش لكن كسبت كتير جدا
كسبت بروحها الرياضية العالية
كسبت بأخلاقها الجميلة

انا مش زعلانة على مصر الي خسرت
على اد منا زعلانة على الي حصل بعد الماتش
العرب بيضربو بعض علشان ماتش؟؟!!
واسرائيل واليهود واقفة تصقف وتقول برافو
وشمتانة في العرب

احنا او الطرف التاني بمعنى اصح
اثبتنالهم اننا اضعف بكتييييييير اوي
واننا لا يمكن اننا نتحد ولو على اتفه الاسباب

ربنا يهدي ويجمع الامة العربية على خير

يارب

7annen said...

لو زعلنا على حاجه فاحنا زعلنا علشان الظلم اللى وقع على المنتخب

لكن هم رجاااااااااله

وتتعوض ان شاء الله

بنت الأسلام said...

جميلة قوى ومعبرة جدا
دمت مبدعا
تحياتى

بنت الأسلام said...

جميلة قوى ومعبرة جدا
دمت مبدعا
تحياتى

mahasen saber said...

جميل اننا نعبر عن حبنا لبلدنا وجميل اننا نحبها

بس غريبه ان ماتش كوره يحسسنا بده

ليه ميكونش ده احساسنا بيها على مدار السنه ونقدملها حاجات مفيده تعبر فعلا عن حبنا

زى ابسط الامور نتقى ربنا فى شغلنا ونحافظ على مواردها ونصونها ونبطل نسرقها ونطلع نخبى فلوسها بره

الشعب لابد له من حكومه تشكمه said...

وانا كمان كان نفسى:(

الأحــــــ إيناس ــــــزان said...

قلبت علينا المواجع يا احمد

الحمد لله على كل حال يارب

شباك موارب/منار said...

جميله اوي يااحمد
بس اول بيتين هيخلوني اعيط
بيحسسوني بالهزيمه
والموضوع مش كدا

ان شاء الله هتعدي
وربنا هياخد بحقنا

تحياتي لقلمك المبدع دائما

sookra said...

حلو اوى احساسك فى الكلمات واحساسك ببلدك
يارب دايما كدا على طول

romansy said...

آيوشة
اهلا يا ايوشه
ربنا يخليكى يارب
جوانا كلام كتير قوى للبلد دى
كرامتنا عمره ما تتهان يا ايوشه
احنا اتعاملنا بطبيتنا ومش متوقعين ان اخونا
قصدى اللى كان اخونا يعمل فينا كده

romansy said...

norahaty
الموضوع يا نورا مش ماتش
خالص انا مش زعلان علشان كده اد ما انا زعلان على المصريين اللى اتهانوا هناك بس انا لو منهم كنت اتوقع كده
واعمل كده لانى مش اتوقع ان الخيانه تجى من اخويا

romansy said...

عاشقة القمر
اهلا يا سميه
فيكى الخير
مصر هتفضل رافعه راسها
طول عمرها

romansy said...

خواطر شابة
دى نكسه بس مش علشان ماتش كوره خسرنا
علشان كنا فاكرين ان العروبه زى ما هى فى دم المصريين
هتبقى فى دم العرب
كده
يارب يكرمنا ويعديها على خير

romansy said...

خواطر شابة

ولا يهمك
الاحساس واصل

romansy said...

rony
مش زعلان يا رونى عن الماتش زعلان على اللى انصابوا وانجرحوا وجريوا
وان الريس مبارك هو اللى اتحرك
من مصر
يعنى حتى مفيش قياده سودانيه

romansy said...

حنان الشافعي

اهلا حنان
طول عمرنا هنفضل عندنا امل
بس اللى شوفناه مش شويه
لما نلاقى الحقد والغل دا من اخوانا
ايه اللى هيحصل تانى

القدر احنا راضين بيه طول عمرنا
لاننا مؤمنين بربنا

romansy said...

زهور الامل
ان شاء الله تعدى
ونرجع كرامتنا
ونلاقى الخير
ونعرف فيه ايه اللى بيحصل هل يا ترى
احنا عملنا حاجه
الا ان قلبنا طيب

romansy said...

ماء تشرين
مش علشان الماتش اد ما علشان مصر
مصر بنحبها قوى
يا قوى
بس زعلانين انها كده
نفسنا تبقى احسن بلد فى الدنيا

romansy said...

لا تـــشـــتــــاق
وجميل يا احمد اننا نبتدى من جديد
لعل الله يحدث بعد ذلك امرا

يارب يا احمد يارب

romansy said...

لاسع افندى
مصر ام الدنيا
تحيا مصر

يا استاذنا

romansy said...

saragebaly
اهلا ساره
كسنا حاجات جميله
كسبنا صورتنا قدام العالم
اخلاقنا الرياضيه
حبنا لبلدنا
ان شاء الله
ارضنا ترجع لينا ونعمر فيها

romansy said...

7annen
اهلا حنين
الظلم دا وقع على مصر كلها
يخطفوا المصريين فى الجزائر ويهدوا
لو فوزنا هنقتلهم
بس دا يرضى مين

romansy said...

بنت الأسلام

شكرا ليكى

ولزيارتك

تحياتى

romansy said...

mahasen saber
ممكن يكون ماتش الكوره دا سبب
اننا نتجمع على شئ جميل
على حب على خير
على كرامه نردها للبلد اللى اتهانت من كل العرب فى كل العالم العربى
حاجات كتير جوانا

romansy said...

لشعب لابد له من حكومه تشكمه
ومين اللى مش نفسه يفرحها فى يوم
متيجى نبتدى من نفسنا

romansy said...

الأحــــــ إيناس ــــــزان
الحمد لله
يا انوسه
الخيره فيما اختاره الله

romansy said...

شباك موارب/منار
الموضوع مش هزيمه بالعكس
احنا فوزنا بكرم اخلاقنا وبحبنا لبعض
البلد دى جميله قوى قوى

romansy said...

sookra
يارب دايما يجمعنا الخير على حب البلد دى

اللهم ااامين

Pink Dreams said...

كـــان نفســى اداوى
قلبــــى اللـــى انجرح
مــن اى شـــــــــــــئ
حاســين معاه بالظلم

احساسك بجد جميل قوى

وقدر الله وما شاء فعل

تتعوض باذن الله

احنا خسرنا الماتش لكن هم خسروا حاجه اهم بكتير
خسروا نفسهم

طوبه فضه وطوبه دهب said...

الحمد لله على كل حال واكيد ما كانش نفسك لوحدك كان نفسنا كلنا بس قدر الله وما شاء فعل

حنين said...

كلام رائع يارومانسى ودائما بتعبر بكلماتك عن حالات بنعيشها وانت فعلا اصبت ده شعورنا كلنا وكان نفسنا بس الحمدلله على كل حال

سفروتة said...

مكنتش متصورة انه ممكن يجي يوم وادعي علي ناس كنت من كام يوم بعتبرهم اخواتي

:(
للاسف دلوقتي بتمني انهم يتمحوا من علي الارض

عاشقه الرومانسيه said...

خيرها فى غيرها يااحمد
ومصر غاليه مهما حصل وهتفضل فوق راس الكل غصب عن الكل

reem said...

كلنا زيك كان نفسنا نلبسها ثوب الفرح

وموافقك جدا ان الموضوع مش موضوع ماتش وزعل عليه

الموضوع اكبر بكتير من كدا

كلامك بجد حلو ومؤثر اوى

عجبنى اوى لما قلت

لان فيـــــنا اللى صـــبر
فينا اللى راضى بالنصيب
و الصـــبر دا مـش غريب

حلوة اوى اوى الكلمات دى

مي said...

قدر الله وماشاء فعل

romansy said...

Pink Dreams
اهلا بيكى يا شوشو
خسروا حاجات كتير قوى قوى
الحمد لله احنا كسبنا
حبنا لبعض

الحمد لله

romansy said...

طوبه فضه وطوبه دهب
الحمد لله يا دهب على كل شئ
الحمد لله اننا خسرنا
وفدينا 8000 مصرى

الحمد لله

romansy said...

حنين
اهلا يا حنين
اكيد كلنا كنا نتمنى كتير وكتير
بس دلوقتى اللى عايشنه اكتر واكتر

romansy said...

سفروتة
عارفه يا سفروته
فيه حديث بيقول فيما معناه
انهم فى رباط الى يوم الدين
شوفى بقى لو الرباط دا يبقى من اقرب الناس ليك
يبقى نفسيتك عامله ايه

romansy said...

عاشقه الرومانسيه
مصر غصب عن الكل فوق راسنا
تعرفى اجمل شئ ان العارض مع الحزب مع الكل المسيحى والمسلم ايد واحده

romansy said...

reem
اهلا بيكى يا استاذه
ربنا يليكى يارب دا احساسى واحساس كل انسان فينا
جوانا اكتر واكتر للبلد الجميله دى

romansy said...

مي
الحمد لله على كل شئ
الحمد لله اننا ايد واحده

شفـقــة و إحســــان said...

ايه الكلام الجميل والتفاؤل ده.....والله فرحتنا بعد الحزن ما سكن قلبنا
كل سنة وانت طيب

جارة القمر said...

عفكرة انت انسان جميل جدا

جوا قلب طيب

جارة القمر said...

كلماتك تأسرني دوما

منى said...

تعرف لاول مره احس فعلا بالجمله اللى طول عمرى بسمعها
احن شعب طيب اوى وعاطفى

عشان كده كنا دايما بنفوت وعشان كده برضه الجرح النفسىكان جامد اوى اوى
ربنا يعوضنا ويصلح الامور


تحياتى

salwa said...

السلام عليكم اخ رومنسي
اسفة للتاخير
ما اضيق العيش لولا فسحة الامل
سلام

romansy said...

شفـقــة و إحســــان
كل سنه وانتم طيبين
احنا مصريين والحزن لو سكن قلبنا مش هنقدر نشتغل
ولا نقدر نعيش
الحمد لله على كل شئ

romansy said...

جارة القمر
اهلا بيكى
بشكرك جدا
بس الطيبه ديه
سمه فى صفات المصريين
الحمد لله

romansy said...

جارة القمر
بشكرك جداجدا
لو نعرف نكتب ونقول اكتر من كده هنقول
فى حبها كتير قوى

romansy said...

منى
اهلا بيكى
والله فعلا احنا شعب طيب قوى
علشان كده ربنا هيجزينا كل خير فى الدنيا والاخره ان شاء الله

romansy said...

salwa
اهلا بيكى يا استاذه
الحمد لله ان الامل شمعه عمرها ما تنطفى فى حياتنا

زى الهوا said...

:(

زى الهوا said...

This event makes us sad , but u must know that Allah does the best for us


certainly

:smile:

MISS\GH said...

انت يا احمد بتقول كلام فعلا بينطق بيه قلبنا وبتتكلم عن حب بلاد بيجرى فى عروقنا وبجد انا مكنتش حاسه انى بحب البلد دى وبفتخر انى منها وحامله اسمها كجنسيه فى شهاده ميلادى او فى بطاقتى الشخصيه الا دلوقتى يمكن انا بعذر نفسى عن عدم وجود الاحساس ده جوايا قبل كده لانى متغربتش عنها او مبعدتش عنها او معاصرتش حروب او ............

لكن احساسى دلوقتى فاق بس فى وقت نادى وقال فيه مبقاش للقوميه اى شىء وبدء العرب فيه يتفرقوا



تحياتى ليك يا رومانسى

كلام من قلبي said...

كلامك جميل جدا كلنا كان نفسنا انها تكسب وتردلنا كرمتنا من الجزائر

romansy said...

زى الهوا
الحمد لله على كل شئ
كل شئ بايد ربنا الخير احنا مش عارفينه فين

romansy said...

MISS\GH
اهلا اهلا
يا استاذه
والله دايما احنا حب بلدنا فى قلبنا
الحمد لله على كل شئ
ونتمنى ان بلدنا تبقى ايد واحده دايما
وقلب واحد

romansy said...

كلام من قلبي
كله خير
الخسره والمكسب من عند ربنا