Friday, February 5, 2010

دلوقتى صعب


من وحى بوست الدكتوره ستيته

وتهون عليكى عشره سنين
بعد كل ظروفنا ديا
انتى عندى كل حاجه
انتى اقرب منى ليا
سابونى اهلى وحيد
وكفايه انتى من الدنيا ديا
كفايه احس انك قصادى
حبيتى وروحى وغاليه عليا
مبتكلمش صحيح بس قلبى
ياما قالك ع اللى فيا
وانتى عارفه اد ايه انا قسيت
لحد ما عملنلنا بيت
بيت يسكن فيه ولادنا
عشا ن ميحوش ببرد
زى ما احنا حسينا بيه
مستقبل وطريق مفروش بورد
ونزيل الشوك كده من عليه
بس اقولك اناحاسس بذنب
ذنب انتى تغفريه
احساس بانى جنيت عليكى
جنيت على حبى الكبير
جنيت على نظره عنيكى
حاولتى معايا كتير وكتير
بس بقى دلوقت صعب
صعب ارجع انسان طبيعى
يعرف تانى مشاعر الحب
بس حاولى ولو تقدرى
انا هعيشلك بالف قلب


68 comments:

mohamed ghalia said...

روعة يا رومانسى بجد
طريقة عرض الخاطرة حلوة أوى والأجمل انها مكتوبة ارتجالية كده

الازهرى said...

صعب يا صاحبى الإنسان يعيش بألف قلب
لنا قلب واحد
ممن ينجرح والزمن يعالجه
وممكن جرح يفضل فيه طول العمر من غير علاج

تحياتى لجمال ما خط قلمك البديع

Pink Dreams said...

بجد ومن غير اى مجاملات

ابسوت دا اكتر من رائع

فعلا تسلم ايدك

سمكه واحده said...

طلما البوست ده مستوحي من عند ستيته
يعني من القصه
اقلك هي هترد تقول ايه علي كلامه
ولا بلاش انا علقت هناك وقلت رد فعلها عليه هيبقي ايه بظبط
بقي يبعت رساله رخمه زي دي وعاوزها تسكت
لالالالالا معندكش حق يا رومانسي
مهما قال بقي لو سكتت وهو بيقول صعب ارجع تاني واعيش بالف قلب شكله كده طمعان في مرتبها وطمعان في مين اللي هيعمل الاكل ويروق الشقه
(وش مطلع لسانه)
بغض النظر عن القصه
انما كلماتك جميله وتستحق الثناء
دمت مبدع

شمس النهار said...

جميلة
جدا
جدا
جدا

ياريس رومانسي

::))

حد قالك علي بكرة

سلامي

همسة حب said...

السلام عليكم
بجد جميله جدا يا رومنسي
سلمت يداك
دمت في حفظ ربي
السلام عليكم

hend anwar said...

جميلة جدا الكلمات
اتمنى الزيارةhttp://hendfreedom.blogspot.com/

TWEETY said...

ازيك ياعمو
انا جيت ازور حضرت
يارب تكون كويس
وهستنى حضرتك تزورنى

SHAPE YOUR LIFE (ABOALI) said...

دلوقتى صعب
اعيش غير انسان طبيعى
صعب اكون من غير قلب
لاءن القلب حب
ولما يحب يبقى عنده مليار قلب
قلب لكيانه وقلب يدواى بيه احبابه
وقلب منور درب حياته
والقلب يحرس قلب
وقلب انت قلب قلبه
والله على قلب انت صاحبه


بديع يا رومانسى وجميل الكلام

بس تفتكر المنافية عندهم قلب طبيعى
انت جاوبت وقولت صعب انى اكون انسان طبيعى (وش بيغمز)



تحياتى يا انسان

ستيتة said...

وااااااااااااااااااااااااااااو

عارف يا رومانسي لو كان خرج من قلبه الكلمتين دول
اي راجل يقدر يطلع بيتين من الأبيات دي
اي ست مش ترضى بس
لأ دي تستحمل ما لا يتحمله مصارع مبتديء بينضرب من بيج شو :)

روعة
لازم اللي قرأ البوست بتاعي يقرأهم
تحياتي

حياه بلا عنوان said...

السلام عليكم ورحمه الله وبركاته
جميل قوى البوست بس الانسان لو ليه الف قلب عمره ماهيقدر يحس او يحب حد حب حقيقى لان ربنا سبحانه وتعالى خلق لنا قلب واحد نعيش بيه والحمدلله يارب على القلب اللى بيحس بحب الناس وحب الحياه البوست جميل ياريت تقبل مرورى
تحياتى

Anonymous said...

بس محدش يقدر يعيش بألف قلب ..

أميرة الرومانسية said...

جميلة اوووووووووووووي يا احمد بجد
لو هي بتحبه بجد هتفضل جنبه وهتعالج كل جروحه وكل اللامه
هتنسيه كل احزانه ....الحب بيدي طاقة هائلة للانسان انه يتحمل كل حاجة ويتحمل اي صعاب عشان حبيبه
وانت لو بتحبها بجد هتنسي اي احزان قبلها وهتنسي اي جروح
ربنا يديم عليك احساسك الجميل

Rosie said...

أولا أنا مبسوطة أنى بعلق تانى ليك..معلش اعذرنى على الغيبة الطويلة..اكتئاب و امتحانات..

ثانيا حاسة إنى عملت تطور كبير بعلق التعليق 14 مش فى الميات زى كل مرة..فعلا من جد وجد..ههه
ثالثا
لحد ما عملنلنا بيت
بيت يسكن فيه ولادنا
عشا ن ميحوش ببرد
الحتة دى اد أيه جميلة و أكتر حاجة عجبتنى أنك نهيت بأمل
صعب ارجع انسان طبيعى
يعرف تانى مشاعر الحب
بس حاولى ولو تقدرى
انا هعيشلك بالف قلب
أكيد لازم كلنا نحاول....

Remas said...

ازيك يا رومانسي

كلامك روعة بجد

انا مع ستوتة في رأيها

ان اى ست تسمع كالمة واحدة تشبه الكلام اللى قلته كانت اتحملت اى حاجة وكل حاجة

دايما جميل يارومانسي

mony said...

مبتكلمش صحيح
بس قلبى ياما
قالك على فيا

لازم تتكلم وتقول
المشاعر وحدها
لا تكفى

إيمان said...

جميل اوى الاحساس ده بس ياخسارة مش بنحس بقيمه الا معانا غير لما يضيع مننا زى اللى بتقول
راجع تانى تترجانى وتقولى نرجع تانى انا بقوله اهوه بلسانى ابعد عنى وانسانى وانسى كمان مكانى
بعت قلبى من زمان ونسى ان معاك الامان
هههههههههههههه انا هالف ولا ايه بجد حسيته اوى بس الندم دايما بيجى متأخر
تحياتى

لــــ زهــــــراء ــــولا said...

تحفه بجد
اكتر من رائعه
تسلم الانامل الذهبيه التى خطت تلك الكلمات الاكتر من رائعه

تقبل اطيب الامنيات بالسعاده

صدى الصمت - عاشقة الورد - said...

كلمات رائعة مميزة
تحياتى لإبداعاتك المتدفقة دائماً

مي said...

جميلة يا احمد بجد
بس ياترى لسة فى رجالة بتعترف بخطأها؟!!!!!!!
اتمنى ذلك الحياة بيبقى فيها مشاكل كتير بتخلينا جنب بعض ومش شايفين بعض بس نرجع زى الاول وبتبقى فترة مادام الاساس متيت الا وهو الحب

ابدعت ياصديقى

romansy said...

mohamed ghalia
ايزيك يا محمد اخبارك ايه
ربنا يخليك يا محمد زى ما حسيت بيها كتبتها
بشكرك جدا جدا يا محمد

تحياتى

romansy said...

الازهرى
اهلا يا صاحبى
اخبارك ايه
الف قلب لحبيبه واحده
الف قلب لقلب واحد
الف قلب يضحى علشان حبه
صحيح ممكن يمتلك قلب بالف قلب
بس هل يا ترى هيستحمل كل الظروف
تحياتى

romansy said...

Pink Dreams
اهلا شوشو
اخبارك ايه
نورتينى

بقالك كتير متختفيه علشان الامتحانات ربنا معاكى


تحياتى

romansy said...

سمكه واحده
ايزيك يا ميكوووو
خللى قلبك كبير بيسامح
صحيح هو غلطان
بس بقى تصبر حبه صغيره كلمه واحده هتدوب كل الفروق اللى كبرت مع مرور الزمن
مرتب ايه بقى اللى طمعان فيه
تفكيركوا محدود قوى كده ليه
والله الرجاله فيهم كويسين كتير وبيتمنوا كلمه حلوه

romansy said...

شمس النهار
ايزيك يا شموسه
اخبارك ايه
يا سلام عليكى يا شموسه دايما كده
بحتحسسينى انى حاجه كبيره قوى
بشكرك يا قمر
لا مفيش حد قالى على حاجه
ايه لقاء ولا ايه

romansy said...

همسة حب
اهلا همسه حب
بشكرك على زيارتك
واتمنى ان شاء الله انى يكون كلامى عجبكوا

تحياتى

romansy said...

sun of free dom
بشكرك جدا على زيارتك واتمنى تكون عجبتك مدونتى المتواضعه وشكرا على الدعوه الجميله

romansy said...

TWEETY
ايزيك اخبار ك
ايه
واخبار بابا

الحمد لله انا كويس
يارب تكونى كويسه


تحياتى

romansy said...

SHAPE YOUR LIFE (ABOALI)
اهلا بيك يا ابو على بيه
هههههههههه
هتقفلى على الواحده يا ابو على
لا المنايفه دول اطهر قلب
اللى فى قلبهم على لسانهم دايما
وبعدينانت بتكتب احسن منى يا سيدى
استاذى بقى

نورتنى يا عمى

romansy said...

ستيته حسب الله الحمش
ايزيك يا دكتوره
اخبارك ايه
والله يا دكتوره جوانا معشر الرجال كتير وكتير قوى
بس بيحتاج مجهود شويه من الزوجه
انها تبحث عن اللؤلؤ فى اعماق البحر الرجالى
وبشكر حضرتك على عرض وجهه نظرك على مدونتك كمان دى حاجه تشرفى والله
تحياتى

romansy said...

حياه بلا عنوان
اهلا بيكى
بسبقى لو الاحساس عالى بيحتاج الفقلب علشان يقدر يعبر عن حبنا
وبشكرك جدا جدا
على زيارتك الجميله


تحياتى

romansy said...

Hager Za3bal
اهلا هاجوره

المحب بجد بجد يقدر يعيش بالف قلب لحبيبه واحده فقط


تحياتى

romansy said...

أميرة الرومانسية
اهلا اميره

اخبارك ايه
اتمنى يا اميره ان كل انسانه تفكر بسانها وهى جنب الانسان اللى بتحبه ممكن تغير ليه حاجات كتير فى حياته
الحياه تكامل بين زوجين


بشكرك


تحياتى

romansy said...

Rosie
اهلا اهلا يادى النور يادى النور

انا مبسوط اكتر واكتر
انك رجعلتنا بالسلامه
وبعدين بقى انتى جيتى بدرى
اصل فيه حاجات كتير اتغيرت
تقدم بقى
نورتينى يا روز

تحياتى

romansy said...

reem
ايزيك يا استاذه
جوانا اكتر من كده
بس محتاج بحث اكتر وصبر اكتر اد ايه عارفين ان الزوجه الاساس فى كل شئ

بس الرجاله عندهم كتير قوى

romansy said...

mony
يعنى لو بتحبنى اكيد هتحسنى وتحس بكل كلمه وكل همسه بقولها
بس برضه انا معاكى ان الكلمه الحلوه مطلوبه

تحياتى

romansy said...

emymony
اهلا بيكى
طيب ليه الندم
فيه لسه قدامنا فرص تانيه
اننا نبتدى من جديد
لسه العمر قدامنا وبعدين قولى براحتك المدونه مدونتك وكلامك احلى من كلامى

romansy said...

لولا وزهراء
اهلا بيكم
بشرك جدا جدا على زيارتكم ومتابعتكم المستمره ليا
واتمنى ان كلامى يعجبكوا

romansy said...

صدى الصمت - عاشقة الورد -
اهلا بيكى يا استاذه
اخبارك ايه
اد اي جوانا كلام جميل نقدرنقوله
بس ياريت كل انسان فينا يحس بالتانى
ويقدر يفهمه

romansy said...

مي
اهلا ميويه
اخبارك ايه
اكيد فيه رجاله بتعترف انها بتخط بس لو فيه زوجه تقدر ليه الخطا دا حصل مش تعاتبه دايما دايما
يبقى بكد هنقدرنفهم بعض ونحب بعض اكتر

أمل حمدي said...

ألف قلب يا رومانسي

هههههه

هاتتعب قوي

خاطرة جميلة يا رومنسي

just waiting said...

الخاطرة بجد جميلة جدا دا شئ لا جدال عليه
والاحساس والفكرة كمان بس اعتقد ان الندم وحده لا يكفي
انت بتقول انها مستوحيه من عند دكتورة ستيته يعني تقريبا اخر قصة اعتقد ان انا لو مكان البطلة وهو اعتذرلي مليون مرة مش هقدر اسامح ومافيش حاجة في الدنيا تقدر ترجعني ليه
تحياتي ليك

Anonymous said...

تحفه بجد

بيكون صعب ان الانسان يحس بحب ومشاعر بعد ما يسيب اللى كان بيحبه

بس كل انسان بيأد فتره زى فتره النقاها وبيرجع انسان طبيعى تانى

Anonymous said...

تسلم ايدك
حلوة اوى

همسات ساكنه said...

حلو اوي البوست ده
كلماته بسيطه لكن معناه جميل وقوي

بس انا ليا اعتراض بس على الف قلب
الانسان بيعيش بقلب واحد
ممكن يبقى كبير وممكن يبقى صغير
لكن الف قلب فممكن كده يكون متقلب .. مره يحبها ومره لا

عايش... ولكن !!!! said...

جميله جدا يا رومنسى
اتمنالك دوام الابداع

Tears said...

حلوة اوى الرومانسية دى امال عيد الحب ح تعمل فيه ايه

:)

د.آيه said...

بسم الله الرحمن الرحيم
أنا تقريبا أول مرة أدخل المدونة هنا ..

بس بجد تحفة ..
جميلو جدا ..
تقبل مرورى

salwa said...

السلام عليكم اخ رومنسي
التسامح يختلف من شخص لاخر
هناك جراح تترك اثارها و لا يمكن محوها
تسلم يدك
سلام

فراشة said...

حتعيش بالف قلب
قلب واحد رقيق حنين يكفيها عن كل الدنيا

MaNoOoSh said...

جميل يا رومنس الاندماج مع القصة

وانا قناعتي ان اللى شاري حد بيصر عليه تحت كل الظروف ومبيستسلمش للفراق

Anonymous said...

حلوة اووووى

زى الهوا said...

حلوة اوى بس هيه ماعتقدتش هتحتاج الف قلب

هيه اكيد هتحتاج قلب واحد يحبها ويخلصلها بجد

ومتهيألى دا عندك يارومانساوى

ياللى مابتبطلش رومانسيه

:)

romansy said...

أمل حمدي

الف قلب فى حبها ياريت يكفوا

romansy said...

Just waiting
جايب ها القساوه منين منين يا طيب
وانا اللى اعرفك زين زين يا حبيب

ليه بقى كده حتى لو حسه انه بيحبك برضه
المسامح كريم

romansy said...

مستخلص افندى
اهلا بيكى يا مستخلص بيك
بس بقى مين اللى يقدر ها الحب
مين اللى يقدر المشاعر والاحساس

romansy said...

7annen
ايزيك يا حنين
شكرا على زيارتك ياقمر


تحياتى

romansy said...

همسات ساكنه
ايزيك يا همسه
الل يخليكى انا بشكرك على كلامك الجميل
بس الف قلب فى حبها هى هيكونوا على طريق واحد هو انه يرضيها بس

romansy said...

عايش... ولكن !!!!
اهلا بيك يا استاذنا
بشكرك جدا على زيارتك واتمنى دوام التواصل

romansy said...

Tears
اهلا بيكى
والله انا عادى خالص لا رومانسى
بس اهو كلام بحسه وبقوله

romansy said...

د.آيه
اهلا بيكى يا دكتوره

شرفتنى زيارتك
واتمنى دوام التواصل

نورتى المدونه

romansy said...

salwa
اهلا بيكى يا استاذه
التسامح ش جميل
وبيقولوا المسامح كريم
فياريت تسامح

romansy said...

فراشة
وبض يا فراشه لو الف قلب فى حبها مش هيكفوا
بس لو بقى اتكرمت وسامحت الراجل الغلبان دا

romansy said...

MaNoOoSh
اهلا منوش
طيب قوليها بقى انى باقى عليها
او بمعنى اصح صاحب القصه باقى عليها ومش قادر يتغنى عنها

romansy said...

star in the sky
اهلا بيكى


نورتينى ونوتى المدونه
ويارب تعجبك دايما

romansy said...

زى الهوا
اولا دى مش حكايتى
ثانيا بقى
انا عارف انى هبطلها هبطلها لما تيجى المحروسه اللى هتجوزها اكيد تكون رغايه وتقعد تشتكيلى من البيت واللى فيه
ومن العيال هتطير البرجين من نفوخى الله يسامحها من قبل ما تيجى

زى الهوا said...

طيب انت بتتنرفز عليا كده ليه؟؟؟؟؟؟؟؟؟

وبعدين ايه اللى مش طايق المحروسه من قبل ماتيجى داااااااااااا ؟؟

ال رومانسى ال

الرومانسيه اتبرت منك خلاص

romansy said...

زى الهوا
براحتى بقى
دى رومانسيتى وانا حرفيها وبعدين هى تطول يا بنتى
اصلا تسلم على رومانسى

يلا روحى مطرح ما كنتى