Saturday, August 28, 2010

ارجع يا زمان



اخواتى المدونين كل سنه وانتم طيبين رمضان عدى علينا زى البرق
بس نعمل ايه بقى هى دى الدنيا يارب يغفر لينا ذنوبنا ويتقبل صيامنا
مش عارف حصل للمدونين ايه وانا كمان حاسس ان حالنا اتبدل واتغير
مش عارف ولا ممكن اكون علشان مش بتابع المدونات من فتره ولا بقيت
اعلق عند اخواتى مش عارف والله بقالى فتره كده حاسس انى اتغيرت
مش بقيت زى الاول بس حاسس انى مش لوحدى فى الحاله دى معظم
المدونين بيختفوا كتير حاسس ان نشاطنا قل كتير عن الاول من اول
رمضان عرفتكوا فيه من تلت سنين حاسس ان فى التلت سنين دول
المنحنى بتاعنا قل كتير مش عارف بقى دى تغيرات فسولوجيه ولا الزمن
قادر يغير فينا كده حاسس انى مش رومنسى بتاع زمان ممكن الكلام اللى
بكتبه حلاوه روح لانى لو مكتبتش هيحصلى حاجه بس كل اللى اتمناه
اننا نكون كويسين كلنا ونحاول نرجع تانى زى زمان فين تامر الحسينى
وفين مولان وفين الفراشه الصغيره وفين طوبه دهب وفين الدكتور عمرو
وفين كيموو وفين اسماء فى وجدانى وفين ماء تشرين وفين فتاه حالمه
وفين وفين نتمنى اننا نرجع زى الاول واكتر ونحاول نصلح اللى انكسر
جوانا لاننا فى الاول وف الاخر ملناش غير بعض مع اننا معظمنا
مشوفناش بعض بس حب بالقلب والروح اكبر نعمه من ربنا
معلش طولت عليكوا بس قولت افضفض معاكوا بقالى كتير مقولتش
اللى جوايا وان شاء الله كده ندعى كده كلنا ان ربنا يلم شملنا
ونبقى ايد واحده واسره واحده فى حب الله
وياريت اللى زعلان منى علشان مش بزوره يسامحنى وياريت اللى
زعلان منى يسامحنى وياريت اللى زعلته من غير قصد يعاتبنى
كل سنه وانتم طيبين ورمضان كريم

Friday, August 27, 2010

هاتى ايديك


مش قادر اوصف واعبر واقولك اى كلام يتقال
غير انى بحبك وبفكر ازاى خليتى حبى جبال
ازاى وانا عمرى ما حبيبت ازاى من غير اى سؤال
ازاى انا اوصف واقولك عن احلى كلام نفسى اقولو
ازاى وانا قلبى محتاجلك محتاج قلبك بس ينولو
محتاج عينك تملا حياتى تنور نهارى وليلى بطولو
هاتى ايديك يلا ف ايدى اى صعب فى طريقنا نزيلو

Thursday, August 19, 2010

حيره وحب


ف لحظه بتقسى وف لحظه بتنسى
وف لحظه بلاقى كده الدنيا وردى
ف لحظه بقولك انا احلى كلام
وف لحظه بضمك يا اجمل غرام
وف لحظه بلاقى كده دموع ع خدى
ف لحظه بتقسى وف لحظه بتنسى
وف لحظه بلاقى كده الدنيا وردى
كلامك يحير وانا احترت فيه
وقلبك يغير ولا اقدر عليه
وحبك كفايه وبالدنيا عندى
ف لحظه بتقسى وف لحظه بتنسى
وف لحظه بلاقى كده الدنيا وردى
حكايتك حكايه وقلبك كبير
قوليلى بحبك قوليها كتير
وعشقك وعايش ف حبك اسير
وحبك دا ساكن دايما فى قلبى
ف لحظه بتقسى وف لحظه بتنسى
وف لحظه بلاقى كده الدنيا وردى

Thursday, August 12, 2010

هليت علينا


هليت علينا يا شهرنا وعدى منك يومين
هو كده انت كده بقى من سنين
بتجى بسرعه وتمشى بسرعه
وتفوت يا غالى فى قلبنا ليك الحنين
بالرغم اننا فى نهارك كتير تعبانين
بنتمناك دايما جنبنا
ولا نفضل منك محرومين
هليت علينا يا شهرنا وعدى منك يومين

Tuesday, August 10, 2010

الله اكرم


رمضان كريم الله اكرم
رمضان عظيم الله اعظم
رمضان فى بيتنا منور حياتنا
لما يجلينا بكل الحب
يملا علينا الدنيا سعاده
يخلى القلب يخاف ع القلب
نحى لياليه بقرئنا
ونحى نهاره بصيامنا
فيه الخير دا يكبر ويكبر
رمضان كريم الله اكرم

Saturday, August 7, 2010

اجمل الاقدار


أود أن اشكر القدر الذى قد قدّر لى أن ألتقى بأجمل ما فى الكون