Wednesday, December 31, 2008

نــنــســــى الـلــــى فــــــا ت



يلا بقى ننسى اللى فات
ومنفكرش غير فى حاجات
تتحقق لينا
نبتدى أجمل امنيات
نبتدى أحلى امنيات
والأحلام مابتتحقش الإبإيدينا
يلا بقى ننسى اللى فات
ومنفكرش غير فى وطن بس يجمعنا
كلمه حب دى تملى حياتنا
وتبقى حياتنا فى يوم ليها معنى
وننسى كل القسوه علينا
يلا بقى ننسى اللى فات
ومنفكرش غير تبقى ازاى احلامنا حقيقه
وازاى نقدر نحققها
ونفكر فيها بكل طريقه
علشان نوصل بقى لهدفنا
ونحب كل الناس حوالينا

Sunday, December 28, 2008

دمـــوع وحـــرب ودمــا ر









دموع وحرب ودمار
وسنه جديده علينا والقلب نار
ولا عارفين ازاى نتهنى
وغزه عايشه فى موت وحصار
دموع وحرب ودمار
واتنين عساكر قالوا احنا لازم نصوم
علشان دى هجره نبينا
ونارنا قايمه فى القلب قوم
وهندعى ساعه فطارنا
يبعد عنا عدو غدار
دموع وحرب ودمار
وام شايله ولدها
بتقوله بكره هتشيل سلاح
وتاخد بتار ابوك واخوك
وكل فلسطينى حلمه راح
عاوزك تبقى يا ابنى
عندك عزيمه واصرار
دموع وحرب ودمار
واب واخد ابنه فى ايده
بيقولوا احنا فى غزه الحزينه
فى بيت لحم اتولد المسيح
والقدس يابنى اطهر مدينه
دافع عنها يا ابنى
وخلى الدم يسيل انهار
دموع وحرب ودمار



Sunday, December 21, 2008

ســــؤال بــيــجــيــب ســــؤال



سـؤال بيجيب سـؤال
ومين يـقدر يـجاوب
ويقولوا مـفيش مـحال
لما نلاقى الحبايب
وندور ع اللى فاتـنا
ونقول دا فاتـنا ليه؟
ونعيش كدا طول حيـاتـنا
نسأل إمتى نلاقيه؟
وسـؤال بيجيب سـؤال
إمتى نلاقى الحبايب؟
واما نلاقى الحبايب
تبقى دنـياتـنا صـعبه
نلقيه فى القلب سـايب
فُرقه وأشـواق وغـربه
وأتارى إللى سابنا
بيسأل نفس السـؤال
وندور ع اللى فاتنا
ونقول دا فاتنا ليه؟
ونعيش كدا طول حياتنا
نسأل إمتى نلاقيه؟
وسؤال بيجيب سؤال
ولا حد عارف يجاوب
ونعيش نسأل ونسأل
إمتى نلاقى الحبايب؟

Sunday, December 7, 2008

دا عــيــد جــانــا




بهنيكوا وأهنى نفسى
أنا معاكوا بعيد جانا
يدب الفرح فى قلوبنا
ويروى الروح دى عطشانا
لحب الخير

ياريت تصفى بقى روحنا
ونداوى قاسنا وجروجنا
ونحب إللى خلانا
نحب الغير

نعيش نحلم يجى بكره
نحقق فيه أما نينا
وننسى همومنا ننساها
ونعيش بقلوبنا مليانا
بحب كبير

دا عيد جانا بيملا حياتنا بالزينه
يخلى الروح كده أحلى
وتبقى الناس دى فرحانه
بخيره كتير

ياريت يبقى دا كل يومين
ويملا أشواقنا بالفرحه
ويحس الحب جوانا
لحب الخير

Tuesday, December 2, 2008

تــــــاجات.........تــــــاجات


دول تاجين تاج السعاده من محمد
اللى انا متاخر عليه
ومن La RoSe
وتاج من مدونه احنا حبايب
من اختى امل

نحل الاول تاج السعاده
السؤال الأول:ماهى السعادة من وجهة نظرك؟
انا بقى يا سيدى شايف السعاده فى انى اسعد اللى حواليه
ودى اهم حاجه علشان برغم احساسك انك مش سعيد
ستبقى سعيد
السؤال الثانى: كيف تصل إلى السعادة؟
هو الصراحه يا محمد الوصول ليها مش بالسهل
ممكن تقدر تسعد اللى حواليك بشئ بسيط
بس الانسان محتاج وقت كبير على ما يوصل للسعاده المطلوبه
السؤال الثالث: هل السعادة وهم أم أنها حلم صعب؟
هى مش وهم ولا حلم صعب
لانها موجوده بالفعل بس مش بالقدر الكافى
السؤال الرابع: هل السعادة طريق للنجاح ؟وضح؟
حاضر
هوضح
السعاده مفتاح كل شئ
لان بابتسامه ممكن تخلى اللى قدامك يفتح لك قلبه
بس تكون الابتسامه صادقه
السؤال الخامس: ماهى أكثر اللحظات التى شعرت فيها بالسعادة؟
مش فاكر بجد هما كام لحظه بالضبط بس اهم لحظه فاكرها ومش ناسيها
لما الاقى كلمه حلوه من الناس اللى نحبهم
السؤال السادس:هل ممكن أن تحقق كل شىء؟
ممكن ليه لا طالما موجود الاراده جوانا
السؤال السابع: السعادة تجعلك تقبل على الحياة أم لا؟
لولا السعاده مكنش فيه حياه توقع كده العالم من غير ضحكه يبقى شكله ايه
السؤال الثامن: هل أحسست يوما انك وصلت لقمة السعادة؟
بخاف اوصل للقمه علشان عارف انى مش هقدر احافظ عليها
السؤال التاسع: لماذا تمر أوقات السعادة بسرعة؟
السؤال دا اسال عليه الساعات ليه هى بتلف بسرعه
السؤال العاشر: هل ترى السعادة فى التدين؟
السعاده فى التدين ممكن بس احنا مولدين على دين الاسلام يعنى دا فرض علينا
اننا نقوم بواجبنا تجاه ديينا
السؤال الحادى عشر: هل أنت متفاؤل وعندك أمل؟ وضح؟
اكيد لازم الانسان يكون عنده امل وتفاؤل لان دا من تعاليم دينا
السؤال الثانى عشر: إذا شعرت بالحزن ماذا تفعل؟
مش عارف مش بقدر ابكى ولا بقدر ابوح لحد
السؤال الثالث عشر: هل يستمر معك الحزن فترة ام ينقضى فى الحال؟
كل حاجه فى الدنيا بتاخد وقتها بس الحزن دايما بيبتدى كبير ويصغر مع الايام
السؤال الرابع عشر: ما رأيك فى الأفراد المتشائمين؟
الله يسامحهم بقى


التاج التانى من امل (مدونه احنا حبايب) نبتدى
أول سؤال: من أنت؟
انابقى انسان عادى جدا جدا ممكن يكون اوقات بيحس انه لوحده
واوقات بيحس ان الناس دايما حواليه بيحاول يكون
نفسه بس مش حد تانى
السؤال الثانى:بطاقتى الشخصيه؟
ايه يا امل هو احنا فى قسم
بس ماااشى مفيش مشكله
الإسم:احمد الدسوقى
السن:27 سنه و23يوم
الديانه: مسلم
العنوان: المنوفيه
الوظيفه: مراقب جوده انتاج
الحاله الإجتماعيه :اعزب

السؤال الثالث :ماهى أحلامك ؟؟؟؟؟
احلامى بسيطه جدا احلام شخصيه انى انجح فى حياتى
ويكون العالم سعيد حواليه
واحقق اللى انا دايما بتمناه
السؤال الرابع :من أقرب شخص إليك؟؟؟؟
اقرب شخص ليه هو احساسى بس مش عارف ليه الايام دى بحس انه بيبعد عنى
السؤال الخامس :تهدى التاج لمين؟؟؟؟؟؟؟
انا مش هعزم اللى عاوز ياخد التاج يتفضل
انا مش هديه لحد مليش دعوه